Álftanes og Garðabær bæta hvort annað upp

Þann 20. október nk. verður gengið til kosninga um sameiningu Álftaness og Garðabæjar. Eins og allir vita þá var fjárhagsleg staða sveitarfélagsins Álftaness með þeim hætti að Eftirlitsnefnd með fjármálum sveitarfélaga lagði það til við þáverandi samgöngu- og sveitarstjórnarráðherra að Sveitarfélaginu Álftanesi yrði skipuð fjárhaldsstjórn, sem hefði forystu um endurskipulagningu fjármála sveitarfélagsins. Fjárhaldsstjórnin var skipuð með vísan til sveitarstjórnarlaga.

Þannig að í raun var verið að svipta bæjarstjórn Álftaness öllum fjárforráðum og fjárhaldsstjórn tók við stjórn fjármála sveitarfélagsins. Þetta var í byrjun febrúar 2010. Meðal þeirrar niðurstöðu, sem fjárhaldsstjórnin komst að, var að samhliða aðgerðum í fjármálum sveitarfélagsins þyrfti að koma til sameining við annað sveitarfélag.

Besta þjónustan á lægsta verðinu

Ég hef lengi verið hlynntur sameiningu sveitarfélaga, því ég tel að víða sé verið að reka allt of margar smáar einingar. Sveitarfélögin eiga hins vegar ekki endilega að vera allt of stór, en þau eiga vera það stór að þau eigi þess kost að veita sem besta þjónustu til handa íbúum fyrir sem lægst verð.

Helstu niðurstöður vinnu fjárhaldsstjórnar og þeirra ráðgjafa sem að vinnunni komu er að sameiginlegt sveitarfélag hefur sömu fjárhagsstöðu og Garðabær eitt og sér eftir aðeins þrjú ár. Og það er miðað við að íbúafjölgun í Garðabæ sé einungis 1,5% og engin íbúafjölgun verði á Álftanesi. Það sem hefur áhrif á þessa stöðu er auðvitað ekki bara tiltekt í rekstri og hagræðing af sameiningu – heldur eru að koma til sérstök framlög úr Jöfnunarsjóði sveitarfélaga á næstu árum.

Viðsnúningur í rekstri

Það sem hefur komið mér hvað mest á óvart í allri þessari vinnu, er aðallega þrennt. Í fyrsta lagi hversu vel endurskipulagning á fjármálum sveitarfélagsins Álftaness hefur gengið – þ.e. tiltekt í rekstri. Í öðru lagi, hversu vel hafa gengið allir samningar við lánardrottna um niðurfellingar á skuldum Álftaness. Og í þriðja lagi hversu fljótt sameiginlegt sveitarfélag er orðið fjárhagslega sterkt og öflugt. Vegna þess hve hlynntur ég hef verið sameiningum sveitarfélaga þá hafði ég í umræðu lagt á það áherslu að ekki mætti horfa til of skamms tíma varðandi hagræðingu. Það er því ákaflega ánægjulegt hve fljótt áætlanir gera ráð fyrir að sameiginlegt sveitarfélag verði fjárhagslega sterkt.

Auðvitað er sameining sveitarfélaga miklu meira en bara krónur og aurar – auðvitað snýst sameining líka um þjónustu, félagslíf, bæjarbrag, menningu og svo framvegis. En við eigum ekki að óttast neitt. Sveitarfélögin koma hvort um sig inn í sameinað sveitarfélag með svo ótalmargt sem bætir hitt upp. Sú upptalning er of löng til að birta hér.