Einnig talinn hafa framleitt MDMA

Tæplega fimmtugur maður, sem var handtekinn fyrir tveimur vikum grunaður um fíkniefnaframleiðslu í bílskúrnum sínum, er nú laus úr gæsluvarðhaldi.

Ekki var talin þörf á að halda honum í gæsluvarðhaldi og einangrun lengur, þótt málið sé enn ekki að fullu upplýst.

Samkvæmt heimildum Fréttablaðsins er talið að maðurinn hafi framleitt bæði amfetamín og MDMA, svokallað e-töfluduft, í aðstöðunni sem hann hafði komið sér upp. Þó var verksmiðjan langt frá því að vera eins fullkomin og sú sem var upprætt í Hafnarfirði sumarið 2008 og leiddi til þungra dóma yfir Tindi Jónssyni og Jónasi Inga Ragnarssyni.

Maðurinn var handtekinn 13. september síðastliðinn eftir að lögreglan fann búnað og efni til framleiðslu fíkniefna í bílskúr í Efstasundi. Þá var einnig leitað í iðnaðarhúsnæði í Hafnarfirði í tengslum við málið. Mikið magn af efnum fannst og voru þau öll send Háskóla Íslands til greiningar. Þeim greiningum er ekki enn lokið.- sh