Segir tveggja turna tal hafa haft áhrif á kjósendur

„Þetta staðfestir að þetta eru kosningar á milli tveggja flokka, turna, eins og kosningar á milli stórra flokka eins og Repúblikana og Demókrata," sagði Herdís Þorgeirsdóttir forsetaframbjóðandi um atkvæðin sem hafa verið talin. Ljóst er að Ólafur Ragnar Grímsson hefur afgerandi forystu. Herdís segir þetta sýna að tveggja turna tal um Þóru Arnórsdóttur og Ólaf Ragnar hafi haft áhrif á kjósendur.

Þá sagði hún einnig að mikil pólitík hafi verið á bak við Ólaf Ragnar og Þóru og þannig hafi fólk kosið „taktískt" eins og hún orðaði það.

Þóra sagðist kampakát, „í samræmi við það sem við höfum séð er þetta bara afrek og ég er kampakát," bætti hún við.

Ólafur Ragnar vildi ekki fagna of fljótt, hann sagði of snemmt að túlka niðurstöðuna en sagði niðurstöðurnar nú ágæta vísbendingu um að honum hefði verið falið að þjóna þjóðinni og bera ábyrgð á þeim skyldum sem forsetaembættið felur í sér.