Boltar í stað stóla í kennslustofunum

Í Lágafellsskóla í Mosfellsbæ eru ekki bara boltar í íþróttahúsnæði skólans heldur líka í sumum kennslustofum. Þegar nemendur þurfa að losna við óróa úr líkamanum í kennslustund geta þeir setið á sérstökum bolta en samtímis verið á hreyfingu.

"Umframorkan fer öll í að halda sér á boltanum. Börnin verða upptekin við það en eru ekki á ferð um stofuna. Þetta er ágætt fyrir þau sem þurfa að fá útrás. Um leið einbeita þau sér betur að náminu," segir Gunnhildur Harðardóttir, deildarstjóri í Lágafellsskóla.

Hugmyndina að boltunum fengu starfsmenn skólans við lestur fræðirita. "Fjallað hefur verið um góðan árangur af tilraunum með boltana í öðrum löndum og þá datt okkur í hug að ef þetta virkaði hjá öðrum þá gæti það líka reynst vel hjá okkur," segir Gunnhildur.

Hún getur þess að upphaflega hafi nemendur sem sérstaklega hafi þurft á einbeitingu að halda verið látnir prófa að sitja á boltum. "Það voru keyptir nokkrir boltar fyrir skólann. Reynslan hefur verið góð og fleiri nemendur hafa prófað þetta en þeir sem þetta var fyrst hugsað fyrir.

Krakkarnir finna sjálfir hvenær þeir þurfa á þessu að halda en þetta hentar ekki öllum börnum.

Í Lágafellsskóla hafa jafnframt verið gerðar tilraunir með notkun heyrnarhlífa fyrir nemendur. "Við höfðum lesið um að þær hefðu komið að góðum notum fyrir þá sem þurfa sérstakt næði til að einbeita sér og nú á skólinn nokkur stykki. Þetta er úrræði sem boðið er við ákveðna vinnu og hefur til dæmis verið hentugt í námsverum. Þeir nemendur sem vilja geta fengið að nota heyrnarhlífar við ákveðnar aðstæður," greinir Gunnhildur frá.

Boltarnir og heyrnarhlífarnar eru notuð í öllum árgöngum þar sem óskað er eftir þeim en ekki bara í fyrstu tveimur árgöngunum þar sem kennt er í opnu rými.

ibs@frettabladid