Dræm kosningaþátttaka

Kjörsókn í forsetakosningunum hefur verið dræmari en í kosningum á undanförnum árum. Formenn kjörstjórna telja að góð utankjörfundarkosning hafi sitt að segja.

Kjörsókn fór fremur rólega á stað og hefur kosning víðast hvar farið vel fram. Á kjörskrá eru 236 þúsund manns. Í Reykjavíkurkjördæmi norður eru 45 þúsund manns á kjörskrá. Klukkan sex höfðu um 17 þúsund manns kosið þar. Það er tæp 38% kjörsókn.

„Þetta er búið að vera bara frekar rólegt og þægilegt, það er bara búið að vera frekar rólegt," sagði Katrín Theodórsdóttir, formaður yfirkjörstjórnar Reykjavíkurkjördæmis Norður.

Í Reykjavíkurkjördæmi suður eru tæplega 45 þúsund manns á kjörskrá. Klukkan sex höfðu 18 þúsund manns kosið eða tæp 41%. Það er 17% minni kjörsókn en í Alþingiskosningunum 2009 en þá var kjörsókn á sama tíma tæp 58%.

Þannig sló þátttaka í utankjörfundarkosningu sló öll met í ár. Um 35 þúsund manns kusu utankjörfundar sem er um 15% þeirra sem eru á kjörskrá. Þau atkvæði eru ekki inni í tölum um kjörsókn í dag.

Í Suðvesturkjördæmi eru 62 þúsund manns á kjörskrá. Þar höfðu klukkan fimm rúmlega 22 þúsund manns kosið eða 36% kjósenda

Þá eru 33 þúsund manns á kjörskrá í Suðurkjördæmi þar höfðu rúmlega 12 þúsund manns kosið klukkan fimm eða um 37% þeirra sem sem eru á kjörskrá.

29 þúsund kjósendur eru á kjörskrá í Norðausturkjördæmi en eru ekki teknar saman tölur um kjörsókn.

Í Norðvesturkjördæmi var kjörsókn síðdegis rúmlega 30%

Kosningarnar hafa að mestu gengið vel fyrir sig en kjörstjórnir hafa þó víða staðið í ströngu og þurft að svara mörgum fyrirspurnum kjósenda. Meðal annars hvort kjósendur geti kosið í gegnum síma.