Leigubílaskýli ekki aftur í Lækjargötu

„Það hefur ekki staðið til boða hjá borginni að setja þetta skýli niður við Mæðragarðinn aftur," segir Ólafur Bjarnason, samgöngustjóri í Reykjavík.

Eins og fram kom í Fréttablaðinu í gær eru leigubílstjórar ósáttir við að biðskýli fyrir leigubílafarþega sem lengi stóð neðan við Mæðragarðinn í Lækjargötu var flutt á mót Hafnarstrætis og Tryggvagötu fyrir um þremur árum. Ólafur segir það rétt hjá leigubílstjórum að nýja staðsetningin hafi ekki verið góð. „Skýlið virkaði aldrei þar sem það var sett niður," játar Ólafur. „Það var aldrei mikill áhugi hjá taxa að það virkaði, svo ég segi það hreint út."

Að sögn Ólafs er umrætt skýli ekki lengur í notkun sem slíkt þótt það standi enn á sama stað. Nú hafi leigubílar hins vegar tækifæri til að taka upp farþega á nóttunni þar sem strætisvagnar stöðva við Lækjartorg á daginn. „Ég veit ekki betur en það gangi en þar er ekki skýli, það er kannski vandinn, en ég hef ekki fundið fyrir kvörtunum frá öðrum en leigubílstjórunum," lýsir Ólafur stöðunni.

Ólafur segir að þótt það hafi hentað umferð leigubíla vel að hafa biðskýlið við Mæðragarðinn eigi skýlið ekki afturkvæmt þangað. „Þar voru bílarnir mjög fljótir að komast út úr bænum aftur en ónæðið var mikið og margar kvartanir úr í nágrenninu. Niðurstaðan varð að borgaryfirvöld vildu ekki hafa þetta þar," segir samgöngustjórinn. - gar