Sér hnúfubakinn út um stofugluggann

„Það er ódýrt að fara í hvalaskoðun á Patreksfirði skal ég segja þér,“ segir Bríet Arnardóttir sem býr á Patreksfirði. Þar geta vegfarendur hæglega séð hnúfubaka frá götum bæjarins. Bríet telur að um fimm skepnur svamli um fjörðinn.

Ásthildur Sturludóttir, bæjarstjóri Vesturbyggðar, segir bæjarbúa og gesti vitanlega hæstánægða með þennan skemmtilega brag sem dýralífið setur á mannlífið þar vestra. „Já, já, það er bara ókeypis hvalaskoðun á Patreksfirði. Ég þarf ekki annað en að horfa út um stofugluggann hjá mér til þess að sjá stökkvandi hnúfubak, það er ekki amalegt,“ segir hún. Hún segir að þessu megi þakka að krökkt sé af smásíld í firðinum.

Bílddælingar fara heldur ekki varhluta af stórhvelum því þegar blaðamaður var á ferð um Arnarfjörðinn sá hann tvo hnúfubaka úti á firði.

Bríet segir að lengi hafi hnísur sést á sunnanverðum Vestfjörðum en það sé einungis nú hin síðustu ár sem þessir risavöxnu hvalir láti sjá sig. Hún segir að þeir hafi verið tíðir í firðinum síðastliðið sumar svo hver veit nema þeir verði árlegir gestir héðan af. Hún lét sér ekki nægja að horfa á risana frá fjöruborðinu en gerði sér nýlega ferð út á fjörð til að líta þá í návígi. „Þeir voru mjög gæfir, stundum vorum við ekki nema tvo metra frá þeim og þeir létu bara vel af því,“ segir hún. Hún segir enn fremur að stundum komi þeir mjög nálægt landi svo landkrabbarnir fá sín tækifæri líka til að líta risana. jse@frettabladid.is