Óvissa og lítil vinna sligar Þingeyringa

?Við vitum ekkert hvað er að gerast hérna,? segir Sólveig Jónsdóttir, fiskvinnslukona hjá Vísi á Þingeyri, sem hefur verið í vinnslustoppi frá 1. júní. Hún segir að auglýst hafi verið í vinnsluhúsinu að vinna hefjist að nýju þann 3. september næstkomandi en þó sé fólk óöruggt um að sú verði raunin. Um þrjátíu manns vinna hjá fyrirtækinu á Þingeyri.

?Það var eiginlega ekkert unnið í maí,? segir hún. ?Svo kom vinnslustoppið 1. júní og við erum á atvinnuleysisbótum þar til 27. júlí en þá erum við víst í sumarfríi.? Vísir er stærsti atvinnuveitandinn á Þingeyri og Sólveig segir að á mörgum heimilum vinni báðar fyrirvinnurnar hjá fyrirtækinu og því sé víða erfitt að færa björg í bú. ?Það er enga aðra vinnu að hafa hérna og síðan eru atvinnuveitendur og ríkisstjórnin með sínum aðgerðum búin að njörva okkur niður hérna. Við getum náttúrlega ekki selt húsin og farið; hver kaupir hús í þorpi þar sem enga vinnu er að fá? Ég er sérstaklega reið út í ríkisstjórnina sem er greinilega ekki að vinna fyrir vinnandi fólk í landinu.?

Hún segir að tíð vinnslustopp séu farin að sliga starfsmenn. ?Þetta er búið að vera svona meira og minna undanfarin ár og svo byrjuðum við ekki fyrr en 23. janúar eftir jólafrí. Þar að auki er aðeins unnið frá átta til þrjú loks þegar unnið er svo maður hangir hérna á horriminni.? Finnbogi Sveinbjörnsson, formaður Verkalýðsfélags Vestfjarða, segir að mikil bragarbót hafi verið gerð á réttindum fiskvinnslufólks árið 2008 en þá var því gert kleift að fara á atvinnuleysisskrá þegar vinnslustopp verða en áður hafi það verið sett á guð og gaddinn.

Hann bendir á annan agnúa á hag Þingeyringa nú því margt skólafólk hefur nú enga vinnu til að hverfa að yfir sumarmánuðina og það hafi ekki rétt á atvinnuleysisbótum. Það geti því lent í því að verða þyngri baggi en ella á foreldrum sínum sem margir hverjir berjast í bökkum.

En það þarf ekki að fara lengra en í næsta fjörð til að fá áminningu um að sumar byggðir geti unnið sig upp úr slíkum vanda. Á Flateyri, þar sem tugir manna örkuðu strætin í fyrra eftir að Eyraroddi lagði upp laupana, er nú fyrirtækið Arctic Oddi komið í fulla vinnslu með um fjörutíu manns í vinnu. Þó er langur vegur frá því að Flateyri hafi reist að fullu úr kútnum frá því að Kambur lokaði en þá misstu 120 manns vinnuna.

jse@frettabladid.is