Flaug 17 metra af mótorhjólinu

Ökumaður vélhjóls slapp betur en á horfðist þegar hann lenti í harkalegum árekstri við bíl á Tangagötu í Vestmannaeyjum í gær. Maðurinn, sem er á þrítugsaldri, kastaðist sautján metra af hjólinu og hafnaði á öðrum bíl. Maðurinn var fluttur á Heilsugæsluna í Vestmannaeyjum til aðhlynningar en síðan var flogið með hann til Reykjavíkur á sjúkrahús. Útlit er fyrir að hann hafi sloppið með lærbrot. Maðurinn var búinn góðum hlífðarfatnaði og hjálmi sem er talinn hafa gert það að verkum að ekki fór verr. - sh