Bensín ætti að lækka meira

Enn er svigrúm fyrir frekari lækkanir á eldsneytisverði að mati FÍB þrátt fyrir að gengi krónunnar vinni á móti verðlækkunum á heimsmarkaði. Forstjóri N1 segir verðlækkanirnar þegar hafa skilað sér að fullu.

Mikil lækkun hefur orðið á eldsneytisverði á heimsmarkaði undanfarið og hefur verðið ekki verið lægra síðan snemma á síðasta ári. Lækkunin hefur ekki skilað sér að öllu leyti til neytenda að mati framkvæmdastjóra Félags íslenskra bifreiðaeigenda (FÍB).

„Að teknu tilliti til gengisþróunar íslensku krónunnar og meðalálagningar á bensín og dísilolíu þá ættu olíufélögin að hafa svigrúm til að lækka verðið um 3 til 4 krónur í viðbót,“ segir Runólfur Ólafsson, framkvæmdastjóri FÍB.

Samkvæmt tölum frá félaginu hefur verðið á brenndri hráolíutunnu verið hæst í yfir 126 dollurum, en hefur verið að sveiflast undir 98 dollara undanfarið.

Hermann Guðmundsson, forstjóri N1, segir miklar verðlækkanir hafa þegar átt sér stað hjá fyrirtækinu, og að þær breytingar sem orðið hafi á heimsmarkaðsverði hafi nú þegar skilað sér til neytenda. Hann segir verðið hafa í raun verið á samfelldri niðurleið síðustu sex vikurnar.

„Við erum búnir að lækka verðið núna á sex vikum um 20 krónur, þó svo að það hafi ekki verið mikið um það fjallað,“ bendir Hermann á og vísar til lítraverðs á 95 oktana bensíni í sjálfsölu.

Hermann segir verðlækkanirnar hafa skilað sér hratt og örugglega til neytenda.

„Við erum búnir að skila öllum þeim lækkunum sem komu fyrir helgi út í verðlagið. Svo kom lækkun seint á föstudaginn, eftir að íslensku mörkuðunum var lokað og sú lækkun kom til framkvæmda fyrir klukkan níu á mánudag.“

Hermann bendir á að á sama tíma og olíuverð hefur farið lækkandi hefur gengi krónunnar versnað. Þetta hafi óneitanlega áhrif á verð bensínlítrans.

„Þegar olían lækkar úti en krónan gefur eftir er engin inneign eftir til frekari lækkunar. Það er bara þannig,“ segir Hermann.

Runólfur væntir þó enn frekari lækkana. „Olíuverð hefur haldið áfram að síga í dag sem ætti að virka jákvætt fyrir neytendur.“- ktg