Athugasemd frá forstjóra Húsasmiðjunnar

Eigandi Múrbúðarinnar, Baldur Björnsson, skrifaði grein í Fréttablaðið 24. apríl síðastliðinn þar sem hann hefur flest sem lýtur að endurreisn Húsasmiðjunnar á hornum sér.

Húsasmiðjan lenti, eins og fjölmörg önnur fyrirtæki, í fjárhagserfiðleikum í kjölfar efnahagshrunsins í lok árs 2008. Afleiðingar þess urðu meðal annars þær að þáverandi eigendur misstu eignarhald sitt á fyrirtækinu, töpuðu sínum fjármunum og hurfu frá rekstrinum. Í framhaldi réðust nýir eigendur í fjárhagslega endurskipulagningu félagsins til að tryggja störf, greiðslur til birgja og ekki síst til að viðhalda samkeppni á markaðnum. Við yfirtöku Vestia ehf., eignarhaldsfélags Landsbankans, á Húsasmiðjunni í lok árs 2009 var að öllu leyti farið eftir þeim ströngu skilyrðum sem þessari yfirtöku voru sett af yfirvöldum.

Eitt helsta markmið fjárhagslegrar endurskipulagningar þeirra fyrirtækja sem til þess eru metin hæf, er að tryggja neytendum áframhaldandi samkeppni á þeim markaði sem fyrirtækin starfa á. Sérstaklega er lögð á það áhersla að fyrirtæki sem tekin eru yfir af bönkum eigi ekki að hætta að keppa eða fara sér hægar í samkeppni. Slíkt myndi valda viðskiptavinum og almenningi tjóni á þeim mörkuðum sem viðkomandi fyrirtæki starfar á. Fyrirtækin eru því ekki rekin í þrot, bútuð upp eða eignir seldar á brunaútsölu heldur er rekstur þeirra endurreistur. Ekkert er gert til að þjóna sérhagsmunum eigenda einstakra samkeppnisaðila sem vilja hafa samkeppni sem minnsta. Auðvitað hefði það verið hagstæðara fyrir eiganda Múrbúðarinnar ef Húsasmiðjan hefði horfið af markaðnum, en það væri verra fyrir neytendur. Það er því lýðskrum hjá eiganda Múrbúðarinnar að klæða sérhagsmuni sína í búning almannahagsmuna.

Samhliða fjárhagslegri endurskipulagningu hefur Húsasmiðjan þurft að hagræða með margvíslegum hætti í sínum rekstri og meðal annars neyðst til að fækka starfólki um 50% frá 2008. Húsasmiðjan hefur notið eðlilegrar rekstrarfjármögnunar hjá sínum viðskiptabanka eins og önnur fyrirtæki og engir fjármunir runnu inn í félagið þegar eignarhald þess breyttist með aðkomu Framtakssjóðs Íslands. Að halda öðru fram er einfaldlega rangt. Í lok árs 2011 var Húsasmiðjan síðan seld til danska fyrirtækisins Bygma A/S fyrir 3,3 milljarða króna og var sú sala til marks um þann árangur sem starfsfólk Húsasmiðjunnar hafði þegar náð í endurreisn félagsins.

Stjórnendur Húsasmiðjunnar vita mætavel út á hvað skoðun Samkeppnisyfirvalda á félaginu gengur enda hafa þeir unnið með yfirvöldum við að upplýsa um starfsemi félagsins auk þess sem verkferlum starfsmanna við verðkannanir í verslunum hefur verið breytt og starfsmenn menntaðir sérstaklega til að mæta öllum kröfum samkeppnislaga.

Húsasmiðjan hefur nú fengið nýtt upphaf með nýjum eigendum og kappkostar að veita viðskiptavinum sínum um land allt framúrskarandi þjónustu og breitt vöruúrval. Húsasmiðjan er vinnustaður tæplega 400 starfsmanna sem nú hafa komist heilir í höfn eftir langt erfiðleikatímabil. Allt vel hugsandi fólk samgleðst með þessum 400 starfsmönnum og fjölskyldum þeirra við þessi tímamót.

Það virðist vera ein helsta aðferð eiganda Múrbúðarinnar að vekja athygli á sjálfum sér og fyrirtæki sínu með því að viðhafa málflutning sem einkennist af dylgjum og rangfærslum í garð samkeppnisaðila sinna. Þar velur hann greinilega aðferð sem þjónar lund hans best.