Smíðar hljóðgervla sem hljóma í tónlist FM Belfast

„Ég hef alltaf haft áhuga á svona föndri og var rosa duglegur að taka hluti í sundur þegar ég var lítill,“ segir Árni Rúnar Hlöðversson, meðlimur FM Belfast, sem hefur smíðað sinn eigin hljóðgervil.

FM Belfast sendir á næstu vikum frá sér nýtt lag, DeLorean, þar sem allir tónar í laginu koma úr hljóðgervli sem Árni smíðaði. Árni hefur ekki stundað neitt nám í tengslum við smíðar á slíkum græjum, heldur fikrað sig áfram sjálfur.

„Internetið kann þetta. Ég hef bara verið duglegur að lesa mér til,“ segir Árni sem hefur nú þegar smíðað nokkur stykki. Suma gerir hann frá grunni og aðra eftir teikningum. „Mér finnst þetta bara svo ótrúlega gaman. Þegar ég geri þá eftir teikningum breyti ég þeim líka yfirleitt aðeins og geri tilraunir,“ segir Árni.

Að smíða hljóðgervil getur tekið mislangan tíma. „Ég get gert einföldustu týpuna á svona hálftíma en svona flóknir eins og þessi sem ég gerði síðast taka töluvert lengri tíma,“ segir Árni sem hefur nýlokið við að búa til hljóðgervil þar sem hann forritar örgjörva sem velur tóna innan skala og fleira í þeim dúr. „Svo lítur þetta alltaf út eins og það sé alveg að hrynja í sundur, en þetta helst nú alltaf saman og það heyrast öll hljóð sem eiga að heyrast,“ bætir hann við. Varahlutina kaupir hann að mestu leyti í gegnum internetið eða í versluninni Íhlutum í Skipholti.

Auk þess að gefa út nýtt lag er nóg framundan hjá Árna og félögum í FM Belfast. Hljómsveitin verður með tónleika á Nasa þann 18. apríl, sem verða líklegast þeirra síðustu tónleikar á staðnum, sem til stendur að rífa. Þá er hljómsveitin á leið til Berlínar í byrjun maí.

„Við erum að fara á hátíðir um alla Evrópu og ætlum að gera út frá Þýskalandi í mánuð. Bæði er ódýrara að fljúga þaðan og það dregur úr álaginu, en þar sem einn meðlimur hljómsveitarinnar er óléttur þá verðum við að reyna að gera þetta aðeins auðveldara,“ segir Árni að lokum.

tinnaros@frettabladid.is