Matís þróar vinnslu og veiðar í Tansaníu

Starfsmenn Matís aðstoða íbúa við Tanganyika-vatn í Tansaníu við að nýta fiskmeti betur. Verkefnið er svar stofnunarinnar við niðurskurði í fjárveitingum.

„Þetta verkefni er mikil áskorun fyrir okkur því þarna eru aðstæður allar mjög frumstæðar og ólíkar því sem við þekkjum. Við þurfum þannig að finna leiðir til að þróa fiskvinnslu út frá því sem er til staðar en getum ekki gengið að því vísu að hafa rafmagn, olíu eða aðra orkugjafa,“ segir Oddur Már Gunnarsson, sviðsstjóri hjá Matís, um verkefni sem stofnunin annast við Tanganyika-vatn í Tansaníu, samkvæmt samningi við stjórnvöld þar í landi.

Að sögn Odds fara starfsmenn Matís í næsta mánuði til Tansaníu. Þeir velja nokkur þorp við vatnið og leiðbeina þar íbúunum. „Mikill fjöldi fólks byggir lífsviðurværi sitt af veiði í vatninu, sem, eins og vinnslan, er með afar frumstæðum hætti. Mikið magn fiskmetis ónýtist ef það selst ekki ferskt sama dag og það er veitt.

Verkefni Matís er ekki síst að þróa aðferðir til að koma upp aðstöðu til að reykja fiskinn, en það er líka reynt að þurrka fisk við mjög frumstæðar aðstæður,“ segir Oddur sem jafnframt er verkefnisstjóri Tansaníu verkefnisins. „Við munum því meðal annars aðstoða við að setja upp þurrkklefa og reykofna sem yrðu keyrðir með sólarorku.“ Í vatninu finnast margir ólíkir stofnar fiska en Matís mun helst aðstoða við veiðar og vinnslu á smáfiski, sem helst má líkja við loðnu.

Verkefnið, sem Matís hreppti eftir útboð á Norðurlöndunum, er fjármagnað af Norræna þróunarsjóðnum (NDF), en verkefnið kostar um 40 milljónir íslenskra króna. Að sögn Odds hefur Matís,eins og fleiri íslenskar stofnanir, þurft að leita sér sértekna vegna niðurskurðar, ekki síst utan landsteinanna.

Matís hefur samið við íslensku fyrirtækin Ráðgarð Skiparáðgjöf ehf. og Verkfræðistofu Jóhanns Indriðasonar ehf. um hluta verkefnisins. Ráðgarður mun hafa umsjón með smíði á sérhæfðu skipi sem nota á til rannsókna á Tanganyika. Þá hefur Matís gert samning við fyrirtæki í Tansaníu sem mun annast félags- og hagfræðilegan hluta verkefnisins og samskipti við heimamenn. svavar@frettabladid.is