Að fórna góðum árangri

Starfsemi sérdeildar fyrir einhverfa í Hamraskóla hefur byggst upp frá árinu 1996 og átti því 15 ára starfsafmæli á síðasta ári. Við deildina starfar frábært fagfólk og nýtur deildin mikils stuðnings og skilnings í skólaumhverfi Hamraskóla hvort sem um er að ræða stjórnendur, kennara, starfsfólk og ekki síst hjá nemendum skólans. Árangur við sérdeildina byggist á því að námið er einstaklingsmiðað og tilheyra börnin bekkjardeild sem þau fara í eftir getu og aðstæðum hverjum sinni.

Breytingar sem fyrst voru kynntar í upphafi árs 2011 að Foldaskóli verði safnskóli á unglingastigi fyrir Bryggju-, Hamra-, Húsa- og Foldahverfi hefur veruleg áhrif á sérdeild Hamraskóla. Nauðsynlegt er að flytja deildina en í raun verður hún lögð niður og ný stofnuð í Foldaskóla.

Eftir fund nokkurra foreldra barna í sérdeildinni með fræðsluyfirvöldum í Reykjavík var ákveðið að settur yrði á laggirnar „starfshópur um sérhæfða sérdeild fyrir nemendur með einhverfu í Hamraskóla vegna flutnings unglingastigs Hamraskóla í Foldaskóla“. Í erindisbréfi eru verkefni hópsins mjög takmörkuð. Lítill skilningur er á þörfum nemenda og sér í lagi einhverfra.

Alls ekki má ræða þá áhættu sem fylgir færslu deildarinnar, hvernig góðum árangri og framförum er stefnt í hættu, né heldur það álag sem breytingar hafa á einhverf börn. Á meðan búa börn, foreldrar og starfsfólk deildarinnar við óþolandi óvissu. Í Hamraskóla er hópur sem þolir slíkt ástand sérlega illa en það eru börnin í sérdeild fyrir einhverfa.

Foreldar barna í sérdeild Hamraskóla eru hlynntir sparnaði og góðri meðferð fjármuna ríkis- og sveitarfélaga. Þessi sameiningaráform eru ekki hluti af því, okkur hefur verið gerð grein fyrir því að eingöngu fagleg rök séu fyrir þessum flutningi deildarinnar.

Enginn veit hins vegar hvað breytingarnar kosta til skamms tíma eða hvaða sparnaði þær eiga að skila til lengri tíma. Eins og málið hefur verið kynnt og unnið fram til þessa er langur vegur frá því að sá ávinningur sé í sjónmáli. Þvert á móti er hér verið að gera atlögu að starfsemi frábærrar sérdeildar, sem hefur byggst upp á löngum tíma og náð góðum árangri.