Eldri popparar snúa aftur

Margir eldri flytjendur snúa aftur árið 2012 með nýtt efni í farteskinu. The Beach Boys, Madonna, Bruce Springsteen og U2 eru á meðal þeirra. Endurkoma margra af risaeðlum tónlistarheimsins er yfirvofandi árið 2012. Nýjar plötur frá The Beach Boys, sem fagna fimmtíu ára afmæli sínu á árinu, Bruce Springsteen, Leonard Cohen, Paul McCartney og Tom Petty eru allar fram undan á árinu.

Madonna er jafnframt að ljúka við sína tólftu hljóðversplötu og syngur hún nýtt efni af henni á úrslitaleik bandaríska fótboltans í febrúar, Super Bowl. Söngkonan, sem verður 54 ára á árinu, vonast til að endurheimta stöðu sína sem drottning poppsins eftir að Lady Gaga hrifsaði af henni kórónuna. Nýja platan er væntanleg í mars og verður sú fyrsta í fjögur ár. Talið er að hún muni líkjast hinni dansvænu Confessions on a Dancefloor sem kom út 2005.

Þrátt fyrir að Bítillinn Sir Paul McCartney verði sjötugur á árinu ætlar hann ekkert að slaka á því glæný plata frá honum er væntanleg í byrjun febrúar. Hún kallast Kisses on the Bottom og hefur að geyma lög sem hafa verið í uppáhaldi hjá honum lengi, auk tveggja nýrra laga. Á meðal gesta verða Stevie Wonder og Eric Clapton. Fyrrum félagi McCartney úr Bítlunum, trommarinn Ringo Starr, gefur jafnframt út sína sautjándu hljóðversplötu. Hún nefnist Ringo 2012 og kemur út í lok janúar.

Þrettánda plata U2, Songs of Ascent, kemur að öllum líkindum út í lok ársins. Upphaflega átti hún að koma út 2010 en vandræðagangur hefur verið með upptökurnar. Þrátt fyrir að Danger Mouse, will.i.am og RedOne hafi allir lagt sitt af mörkum er óvíst hvort eitthvað af því efni verður notað í lokaútgáfunni.

Bresku rokkararnir í The Stone Roses ætla að snúa aftur á árinu með þrennum tónleikum í Manchester í sumar. Þeir ætla einnig í hljóðver og bíða aðdáendur spenntir eftir fyrstu plötu sveitarinnar í átján ár. Möguleg plata frá Blur hefur einnig verið nefnd til sögunnar.

Eins og The Beach Boys verður The Rolling Stones fimmtug á árinu. Engin plata er væntanleg frá Jagger og félögum en orðrómur um stóra tónleikaferð um heiminn hefur verið uppi.

Yngri hljómsveitir og tónlistarmenn eru að sjálfsögðu einnig með spennandi plötur í pokahorninu. Þar má nefna Muse, The Killers, The xx, Mumford and Sons, Robbie Williams, Marilyn Manson, Sleigh Bells, Green Day, Queens of the Stone Age, The Strokes, Alice in Chains og Nicki Minaj.