Ákall til Alþingis um Dýrafjarðargöng

Vestfirðingar safna nú undirskriftum undir ákall til stjórnvalda um að Dýrafjarðargöng fái forgang og fram fyrir Vaðlaheiðargöng og Norðfjarðargöng. Bíll komst yfir Hrafnseyrarheiði í dag í fyrsta sinn í fjóra mánuði.

Ákall um Dýrafjarðargöng er yfirskriftin sem lýsir vel hve heitt samgöngumálin brenna á Vestfirðingum. Hörður Sigtryggsson, skipasmiður á Þingeyri, beitti sér fyrir söfnun undirskriftanna en þar er skorað á stjórnvöld að hraða Dýrafjarðargöngum og að þau verði næsta jarðgangaframkvæmd.

Vestfjarðavegur, megintenging vestfirsku byggðanna, hefur meira og minna verið lokaður í allan vetur vegna ófærðar á Hrafnseyrarheiði og Dynjandisheiði en göngunum er ætlað að leysa af Hrafnseyrarheiði og stytta leiðina um 27 kílómetra.

Áformað var að moka heiðarnar í síðasta mánuði en hætt var við það vegna mikils fannfergis og það var fyrst í gær sem Vegagerðin treysti sér til að hefja snjómokstur þar af fullum krafti. Um þrjúleytið í dag var verkið það langt komið að jeppi komst yfir Hrafnseyrarheiðina, sá fyrsti sem kemst í gegn frá því um miðjan desember. Mikill klaki er þó á veginum sem brjóta þarf af og mokstri á Dynjandisheiði er ólokið en Sigurður Mar Óskarsson hjá Vegagerðinni á Ísafirði vonast til að báðar heiðarnar verði orðnar færar síðdegis á morgun.

Formaður bæjarráðs Ísafjarðar, Eiríkur Finnur Greipsson, lýsti nýlega í viðtali á Stöð 2 þeirri framtíðarsýn sem birtist í samgönguáætlun sem ömurlegri.

"Það er bara verið að svíkja áður útgefin loforð. Og það þarf ekkert að skýla sér á bak við að hér hafi orðið efnahagslegt hrun," sagði Eiríkur Finnur. Þetta væri ekki bjóðandi nútíma samfélagi.