Sömdu innbyrðis um hlutfall makrílkvóta til Íslands og Færeyja

Norðmenn og Evrópusambandið hafa samið innbyrðis um hve hátt hlutfall makrílkvóta síns þessir aðilar gefa eftir í samningum við Ísland og Færeyjar ef samningar nást.

Samkomulagið kveður á um að fyrir hvert eitt prósent sem Norðmenn gefa eftir af makrílkvóta til handa Íslandi og Færeyjum muni Evrópusambandið gefa eftir 2,14% af sínum kvóta.

Í síðustu samningaviðræðum snemma í haust kom fram að Norðmenn og Evrópusambandið voru tilbúnir til að láta Ísland og Færeyjar fá sameiginlega 14% af heildarkvótanum. Þetta þýðir að Norðmenn vildu ekki gefa eftir nema innan við 5% af sínum makrílkvóta.

Kvótaviðræður milli Norðmanna og Evrópusambandsins um ýmsar fisktegundir eins og makríl, þorsk í Barentshafi og Norðursjávarsíldina hefjast í dag og standa út vikuna. Fjallað er um málið á vefsíðu Verdens Gang. Þar er haft eftir Ann Kristin Westberg aðalsamningamanni Norðmanna að hún eigi von á að viðræðurnar gangi snurðulaust fyrir sig.

Westberg er hinsvegar mjög svartsýn á að samkomulag við Ísland og Færeyjar um makrílinn sé í sjónmáli. Sem stendur sé boltinn í því máli í höndum Íslendinga og Færeyinga, að sögn hennar.