Segir skort á vegriðum skapa stórhættu

Varaformaður FÍB gagnrýnir að ekki sé búið að setja upp vegrið á milli akbrauta á Reykjanesbrautinni en mildi þykir að ekki hafa farið illa í umferðarslysi þar í gær. Umferðin um brautina er þess eðlis að núverandi aðstæður skapa hættu á stórslysi.

Ökumaðurinn slasaðist, en þó ekki lífshættulega, í slysinu sem varð vegna óvæntrar hálku rétt fyrir klukka sex í gærmorgun.

„Í þessu tilfelli þá er viðkomandi á leiðinni til Reykjavíkur þannig að aðalumferðin er á leiðinni suður eftir og þar með talið allar rúturnar," útskýrir Ólafur Guðmundsson, varaformaður FÍB.

Það var því ótrúleg mildi að enginn bíll hafi komið á móti þegar slysið átti sér stað. Engin vegrið eru á milli akbrautanna heldur svokölluð geil sem Ólafur segir geta verið á við stökkpall fyrir bíla.

„Það er nákvæmlega það sem gerist hér. Við sjáum það bara hér á förunum, bíllinn hefur farið ofan í geilina og upp úr henni hinum megin. Það eru engin för hér á götunni fyrr en hann lendir hér á aðreininni frá vegamótunum niður í Voga og það eru engin ummerki fyrr en að bíllinn lendir, þar sjáum við dekkjaför. Þetta er, ætli maður sé ekki að giska á um 15 metra flug," segir hann.

Ólafur segir að vegrið vanti á alltof mörgum stöðum hér á landi sérstaklega á milli akgreina á tvöföldum vegum. Slys sem hafi orðið vegna þessa séu alltof mörg. „Og því miður mjög alvarleg sum eins og við munum við Arnarnesveginn og þetta hefur gerst á Vesturlandsveginum líka og nokkur tilvik eftir að tvöföldunin kom hérna á Reykjanesbrautina sem ég veit til þess að bílar hafa farið eins og hér ofan í geilina, flogið upp úr og farið út af hinum megin. Það hættulegasta í þessu er það að ef þetta myndi gerast undir þeim kringumstæðum að rúta væri að koma á móti, þá værum við að horfa sennilega á umferðarslys sem við höfum aldrei áður séð gerast á Íslandi," segir Ólafur og bætir við:

„Þetta er bara spurning um að leyfa vegagerðinni að klára þetta mál og þar snýst málið um peninga."