Vímuefnavandi algeng orsök í barnaverndarmálum

Tæpur þriðjungur barna sem barnaverndarnefnd Reykjavíkur hefur afskipti af hafa orðið fyrir tjóni af völdum neysluvanda foreldra samkvæmt nýrri íslenskri rannsókn. Málin eru mjög alvarleg að sögn afbrotafræðings og oft reynir á róttæk úrræði.

Hildigunnur Ólafsdóttir og Kristný Steingrímsdóttir tóku til skoðunar að beiðni Velferðarráðuneytisins rúmlega tólfhundruð tilkynningar sem bárust Barnaverndarnefnd á um hálfs árs tímabili. Þrjátíu og eitt prósent þeirra, eða um þrjúhundruð og áttatíu tilkynningar voru vegna neysluvanda foreldra og vörðuðu þær rúmlega tvöhundruð börn.

„Þetta eru mjög alvarleg mál. Þannig að í hvert skipti sem tilkynnt er um neysluvanda til barnaverndar þá er full ástæða til að vera virkilega á varðbergi. Það gefur tilefni til þess að það er ekki tilkynnt nema neyslan sé orðin mjög mikil og stefni lífi og heilsu og velferð barnsins í hættu," segir Hildigunnur Ólafsdóttir, afbrotafræðingur.

Það er lögreglan sem tilkynnir flest þessara mála en nærumhverfið er einnig mjög virkt.

„Það er fjölskyldan, nágrannar, vinir og ættingjar sem eru mjög virkir í að tilkynna. Það bendir til þess að þau verða fyrr vör við að það sé eitthvað alvarlegt á ferðinni heldur en stofnanir samfélagsins, eins og skóli, heilbrigðisþjónusta og aðrar stofnanir."

Og athygli vekur hve oft reynir á róttæk úrræði í þessum málum: „Í rauninni, ef við reiknum hlutfallið þá er alltaf helmingur fósturbarna út af neysluvanda foreldra," segir Kristný Steingrímsdóttir, félagsráðgjafi.

Hildigunnur segir landsmenn þurfa að hugsa betur út í hvaða reglur gilda um meðferð áfengis á samverustundum fjölskyldunnar.

„Ég held að þessar reglur samfélagsins séu frekar óljósar og það gerir kannski starfsfólki stofnanna og barnaverndar erfitt fyrir hvenær á að grípa inn og hvenær ekki," segir Hildigunnur að lokum.