Steindór Hjörleifsson látinn

Steindór Hjörleifsson leikari er látinn. Hann lést á heimili sínu á fimmtudag, 86 ára gamall.

Steindór vann ýmis störf eftir gagnfræðapróf. Hann lauk námi frá Leiklistarskóla Lárusar Pálssonar árið 1949 og nam við leiklistardeild danska útvarpsins. Árið 1965 varð hann fyrsti dagskrárstjóri lista- og skemmtideildar Sjónvarpsins.

Steindór var leikari og leikstjóri hjá Leikfélagi Reykjavíkur frá 1947 auk þess sem hann sat í stjórn og var formaður. Hann lék einnig hjá Þjóðleikhúsinu, Ríkisútvarpinu og í kvikmyndum. Hann hlaut fjölmargar viðurkenningar fyrir störf sín.

Steindór var giftur Margréti Ólafsdóttur leikkonu, en hún lést í fyrra. Dóttir Steindórs og Margrétar er Ragnheiður Kristín.