Hvað þýðir NEI í þjóðaratkvæðagreiðslu

Yfirlætislaus grein í Vísi í dag varð mér tilefni hugrenninga sem hér fara á eftir.

Þar kemur fram að Bjarni Benediktsson hafi sent tölvubréf til allra skráðra félagsmanna D-listans þar sem hann hvetur þá til að kjósa með neitun fyrirliggjandi drög að stjórnarskrá okkar sem kosið verður um nú um helgina.

Með þessum tilmælum varpar þessi úlfur og forgöngumaður Hrunverja af sér sauðargæru þeirra Engeyinga. Ég sem sjálfstæðismaður hef aldrei tvílað samvizkusemi og heiðarleika þeirrar ættar, sem vinnubrögð frænda hans og alnafna á öldinni sem leið bera um ljósan vott.

Með þessum tilmælum sýnir hann dæmalausa óvirðingu starfi þeirra mætu manna og kvenna, sem lögðu nótt við dag við gerð þessa plaggs sem ætti að leiða okkur með farsæld inn á nýja öld. Nýrri stjórnarskrá er nú ætlað að leysa af hólmi hina nær fimmtugu, sem var frá upphafi aðeins flaustursleg þýðing og lítils háttar staðfæring á þeirri dönsku, sem samin var rétt fyrir stofnun lýðveldisins fyrir Þingvallafundinn 1944 og aldrei var ætluð annað en til bráðabirgða rétt fram yfir þann eftirminnilega rigningardag.

Vinnubrögð þeirra stjórnarskrárnefndarmanna ættu að verða til fyrirmyndar okkar alþingismönnum. Hér voru málin leyst skipulega og í sátt við alla, enda komu hér að málum sérfræðingar á sviðum hinna ýmsu fræðigreina, fólk með áratuga starfsreynslu og þekkingu að baki í ýmsum greinum þjóðfélagsins laust við pólitískan hráskinnaleik.

Varla var prentsvertan þornuð á hinni nýju stjórnarskrá þegar ramakvein barst úr herbúðum Hrunverja, sem töldu hagsmunum sínum ógnað. Einkum er það greinin sem fjallar um þjóðareign á auðlindum landsins sem fer fyrir brjóstið á þeim.

Á Alþingi hafa D-listamenn reynt eftir mætti að tefja framgang umfjöllunar um stjórnarskrá með öllum tiltækilegum ráðum, gengið hefur fjöllum hærra sá orðrómur að þeir séu með annað uppkast tilbúið, sem hugnast helzt þeirra skjólstæðingum. Þá hafa þeir mylgrað út greinum þar sem reynt er að tortryggja nýju stjórnarskrárdrögin á allan máta þar sem tíndur er til hvers kyns tittlingaskítur, sem virðist eiga greiða leið inn í málgagn undir stjórn höfuðarkitekts Hrunsins.

Það sem liggur að baki þessari herferð er að hygla dyggum þjónum flokksins. Segja má að grunntónninn í þeim greinum sé að standa vörð um hag þeirra fáu hundruða LÍÚ-manna sem fleytt hafa rjómann af gróða okkar aðalatvinnuvegs og byggja á þeim rétti, sem þeim var ókeypis færður í hendur. Segja má að þjóðareign megi setja í stað kvótaréttar víðast hvar í þeirri umfjöllun enda þótt farið sé í kringum það orð rétt eins og kettir í kringum heitan graut.

Hvað merkir svo svar okkar og hvernig verður það túlkað í höfuðstöðvum Hrunverja og LÍÚ?

Nei þýðir stuðning við Hrunverja og þar með að LÍÚ haldi sínum feng óskiptum.

Kópavogi 17.10.2012