Íslenskt fyrirtæki blómstrar

Íslenska tímaskráningar- og áætlunargerðarkerfið Tempo frá TM Software er nú orðið söluhæsta viðbótin á sölutorgi ástralska upplýsingafyrirtækisins Atlassian, en sölutorgið er með stærri markaðstorgum fyrir viðskipti á fyrirtækjalausnum. Tempo er starfseining innan TM Software sem er dótturfélag Nýherja.

Velta í kringum Tempo hugbúnaðinn hefur margfaldast og stefnir í að verða 300% meiri en í fyrra, sem var metár. Lausnin er einungis seld í gegnum netið.

Tempo, sem er tímaskráningar- og áætlunargerðarviðbót fyrir Atlassian JIRA, hefur nú um 2.000 viðskiptavini í 70 löndum, þ.á.m. mörg stærstu fyrirtæki heimsins eins og Deutsche Bank, Intel og AT&T.

Starfsmaður fyrirtækisins segist hafa fundið fyrir miklum meðbyr uppá síðkastið.