Djúpið fær glimrandi dóma

Kvikmyndin Djúpið í leikstjórn Baltasar Kormáks fær afbragðs dóma í erlendum fjölmiðlum. Baltasar er meðal annars sagður ná fram áhrifamiklum og raunhæfum senum úti á sjó sem minna á bestu verk leikstjóranna James Cameron og Wolfgang Petersen.

Djúpið var frumsýnd á kvikmyndahátíðinni í Toronto síðastliðið föstudagskvöld og fékk hún strax góð viðbrögð en eins og fréttastofa greindi frá á laugardag höfðu Bandaríkjamenn strax sýnt áhuga á að endurgera myndina.

Handrit kvimyndarinnar byggir á atburði sem varð árið 1984 en þá sökk skipið Hellisey austur af Heimaey. Fjórir af fimm skipverjum drukknuðu en einum þeirra, Guðlaugur Friðþórsson, tókst að synda sex kílómetra og ná til lands.

Sagan er átakamikil og segir í dómi Hollywood Reporter að senur í fyrrihluta myndarinnar sem gerast úti á sjó séu mjög áhrifamiklar og raunhæfar og minni á bestu verk James Cameron, leikstjóra Titanic og Avatar og Wolfgang Petersen, sem meðal annars leikstýrði the Perfect Storm og Das Boot. Gagnrýnandi Hollywood Reporter telur hins vegar myndina missa kraft í seinni hlutanum þar sem Guðlaugur eða Gulli, sem leikinn er af Ólafi Darra Ólafssyni, er kominn í land og þarf að takast á við afleiðingar þess að vera á lífi. Þá segir í dómnum að mynd- og hljóðvinnslu myndarinnar sé framúrskarandi og styðji vel við stórbrotna atburðarrásina.

New York Times segir í umfjöllun sinni um kvikmyndahátíðina í Toronto að tugir mynda á hátíðinni séu byggðar á raunverulegum atburðum og er þar sérstaklega minnst á sögu Guðlaugs og talað um að ískaldur sjórinn, hvassir steinarnir og óendanlegt svartnætti vofi yfir manninum í sögu um tilveru hans og tómleika.

Þá er myndin lofuð í hástert á heimasíðu Screen Daily en þar segir meðal annars að glæsilegt sjónarspil og draugaleg hljóð miskunnarlausrar náttúrunnar ásamt hrífandi söguþræði ætti að lokka til sín marga áhorfendur.