Höfðu ekki hugmynd um risasmyglmál

Forsvarsmenn Eimskip vissu ekki af umfangsmikilli rannsókn lögreglu á smygli starfsmanna Eimskip. „Við vitum aldrei af rannsóknum fyrr en mennirnir eru teknir," segir Ólafur William Hand, upplýsingafulltrúi Eimskip. Hann segir félagið hins vegar vinna náið með lögregluyfirvöldum og Tollgæslunni eftir að tilkynnt er um málið og veita allar upplýsingar sem óskað er eftir.

Þrír starfsmenn Eimskip voru handteknir á sunnudag vegna umfangsmikils smyglmáls. Þeim verður öllum vikið frá störfum. „Innan veggja Eimskip er ekki tekið léttvægt á smyglmálum," segir Ólafur. Fyrirtækið starfar eftir svokallaðri non-tolerant stefnu, þ.e. engan veginn er liðið að skipverjar noti ferðirnar til að smygla.

Málið sem nú kom upp er afar umfangsmikið, til að mynda er um að ræða tíu þúsund steratöflur. Að sögn Ólafs koma slík mál illu heilli upp með reglulegu millibili. „Þetta gerist kannski með svona tveggja ára millibili," segir hann. Starfsmennirnir sem um ræðir höfðu allir unnið hjá Eimskip í einhver ár.

„Það væri óskandi að menn hugsuðu um afleiðingarnar þegar þeir fara út í svona vitleysu. Menn missa starfið sitt, menn missa lifibrauðið sitt og menn eru komnir á sakaskrá. Þetta er miklu meira en að segja það og það er sorglegt fyrir fjölskyldumenn að lenda í svona rugli," segir Ólafur