Vill leysa makríldeiluna fyrir næsta fiskveiðiár

Sjávarútvegsmálastjóri Evrópusambandsins segist hafa sýnt mikinn sveigjanleika í makríldeilunni. Íslensk stjórnvöld þurfi nú að koma til móts við samningsaðila sína. Þá þurfi að finna lausn á málinu fyrir næsta fiskveiðiár.

María Daminaki, sjávarútvegsstjóri Evrópusambandsins er stödd á Íslandi vegna fundar sjávarútvegsráðherra Norður-atlanthafsríkja. Hún segir makríldeiluna ekki vera á dagskrá fundarinsen hún hyggst engu að síður ræða málið við ráðamenn.

„Málið er til staðar og vandinn líka. Við verðum að leysa hann," segir Daminaki.

Hún segir málið erfitt og skilja vel að Íslendingar séu viðkvæmir þegar að því kemur.

„Þetta er ekki tilfinningalegs eðlis. Við þurfum að finna lausn. Ég er sannfærð um það og því þurfum við að einbeita okkur að því að greiða fyrir ferli með það í huga að lausn náist."

Hún segist því stefna að fleiri fundum um málið á næstunni.

„Ég vonast til þess að við náum samkomulagi fyrir árslok. Reyndar ekki fyrir árslok því við þurfum að ná samkomulagi snemma í haust því við þurfum að undirbúa okkur fyrir næsta fiskveiðitímabil. Við höfum verið samningslaus í þrjú ár. Það eru þrjú ár gegn fiskistofnunum. Við höfum ekki efni á fjórða árinu því þá eru fiskistofnarnir í hættu."

Hún segir ríkin þurfa að virða lög og sýna sveigjanleika í viðræðunum.

„Við höfum sýnt mikinn sveigjanleika og ég vona að íslensk stjórnvöld sýni einnig sveigjanleika svo lausn náist," segir Danimaki.

Hún segist skilja vel að Ísland hafi mikilla hagsmuna að gæta þegar sjávarútvegskaflinn verður opnaður í aðildarviðræðum Íslands við Evrópusambandið.

„Kaflinn hefur ekki verið opnaður því menn eru ekki á eitt sáttir í ráðherraráðinu. Við þurfum að leggja meira á okkur til að ná samkomulagi við íslensk stjórnvöld svo unnt verði að komast að niðurstöðu sem báðir aðilar sættast á svo lausn náist á þeim ágreiningsefnum sem út af borðinu standa."