Vill rannsaka rassskellingarnar

Álfheiður Ingadóttir, þingmaður Vinstri grænna, vill að íþróttahreyfingin rannsaki rassskellingar meðal ungra íþróttamanna. Hún hvetur hreyfinguna ennfremur til að fordæma slíka vígslur.

Álfheiður tók málið upp á Alþingi í morgun.

„Ómar Ragnarsson hefur skorað á íþróttahreyfinguna að láta rannsaka þetta mál. Þetta hafi byrjað í landsliðshópnum og breiðst eins og eldur í sinu niður í nýliða og barnahópana sérstaklega í boltaíþróttum. Hann hefur krafist þess að íþróttahreyfingin grípi til aðgerða."

Álfheiður sagði nauðsynlegt að íþróttahreyfingin rannsaki þetta mál.

„Ég vil spyrja háttvirtan þingmann hvort hún sé sammála mér um það að þetta verði að rannsaka, fordæma og uppræta."

Ragnheiður Ríkarðsdóttir, þingmaður Sjálfstæðisflokks, sagðist ekki vita til þess að rassskellingar væru stundaðar meðal yngri íþróttamanna.

„Ég tek undir með háttvirtum þingmanni og ég tek undir með Ómari Ragnarssyni. Þetta skulum við skoða því ef við ætlum að hvetja krakka til að stunda íþróttir, þá styðjum við við þau alla leið. Við brjótum þau ekki niður á einhverjum tíma."