Kveðst saklaus af innherjasvikum

Friðfinnur Ragnar Sigurðsson, fyrrverandi millistjórnandi hjá Glitni, neitaði því fyrir dómi í gær að hafa gerst sekur um tuttugu milljóna króna innherjasvik árið 2008.

Ákæra í málinu var þingfest í Héraðsdómi Reykjaness í gær. Samkvæmt henni seldi Friðfinnur, sem var forstöðumaður millibankamarkaðar í fjárstýringu bankans, hlutabréf sín í Glitni fyrir samtals tæpar 20,2 milljónir á árinu 2008, fyrst í mars, síðan í apríl og síðast um miðjan september.

Fullyrt er í ákærunni að hann hafi í öllum tilvikum búið yfir innherjaupplýsingum um slæma lausafjárstöðu bankans í krafti stöðu sinnar. Þær hafi einkum borist honum í fjölda tilgreindra tölvuskeyta frá samstarfsmönnum hans, þar sem farið var yfir lausafjárstöðu bankans.

Þetta er annað innherjasvikamálið sem sérstakur saksóknari höfðar frá bankahruni. Það fyrra var á hendur Baldri Guðlaugssyni, fyrrverandi ráðuneytisstjóra, sem var sakfelldur fyrir 192 milljóna króna innherjasvik og dæmdur í tveggja ára fangelsi. - sh