Fimm ára fá inni í Flataskóla

Flataskóli í Garðabæ mun í haust bjóða foreldrum fimm ára barna upp á val um að senda barn sitt í grunnskóla einu ári fyrr en áður. Ólöf Sigurðardóttir skólastjóri Flataskóla segir ráðist í verkefnið á faglegum forsendum.

„Þetta verkefni hjá okkur í Flataskóla er fyrsta stigið í samrekstri leik- og grunnskóla sem verið er að skoða um þessar mundir,“ segir Ólöf.

Fimm ára bekkurinn fær aðstöðu í sömu álmu og sex ára börnin í fyrsta bekk grunnskólans. „Við gerum ráð fyrir nánu samstarfi og flæði milli þessara tveggja hópa.“

Foreldrar fimm ára barna í Garðabæ geta því valið hvort börnin fari áfram í leikskóla eða ári fyrr í grunnskóla. „Þetta er ein af fjölmörgum leiðum sem hægt er að fara til að auka fjölbreytni í skólakerfinu,“ segir Ólöf.

Hingað til hafa aðallega einkaskólar boðið upp á þessa þjónustu fyrir fimm ára börn en Ólöf segir marga foreldra hafa sýnt áhuga á að senda börn sín fyrr í grunnskóla. „Sumir hafa saknað þess að fá ekki þessa þjónustu í bæjarskólunum. Þeir foreldrar sem við höfum heyrt í eru spenntir fyrir þessari nýjung.“- bþh