Íslendingum mun fjölga gríðarlega

Íslendingar verða að minnsta kosti orðnir 393 þúsund talsins árið 2061 samkvæmt mannfjöldaspá Hagstofunnar. Ítrasta spá, eða svokölluð háspá, gerir reyndar ráð fyrir því að mannfjöldinn verði orðinn 498 þúsund og miðspá gerir ráð fyrir að mannfjöldinn verði 436 þúsund.

Í öllum spám er gert ráð fyrir að fleiri flytji til landsins en frá því. Þar verður helst um erlenda ríkisborgara að ræða en til lengri tíma litið flytja jafnan fleiri íslenskir ríkisborgarar til útlanda en snúa heim. Sé ekki gert ráð fyrir neinum áhrifum af búferlaflutningum til fækkunar eða fjölgunar yrði mannfjöldaþróun landsins nokkuð önnur en hér er gert ráð fyrir í meginafbrigðum mannfjöldaspárinnar. Sé miðað við forsendur miðspárinnar að öðru leyti yrðu landsmenn í lok tímabilsins rúmlega 51 þúsund færri en ella.

Aldurskipting landsmanna breytist mjög á tímabilinu. Hlutfallslega fjölgar þeim sem eru 65 ára og eldri en yngra fólki fækkar.