Fangelsið á Hólmsheiði - Arkís sigraði

Arkitektastofan Arkís sigraði í samkeppni um hönnun fangelsis á Hólmsheiði. Alls bárust átján tillögur og voru veitt verðlaun fyrir þær þrjár sem þóttu bera af.

Það var Framkvæmdasýsla ríkisins sem stóð fyrir samkeppninni en hún var auglýst snemma á þessu ári.

Arkís fékk 5 milljón krónur í sigurverðlaun á meðan arkitektastofan arkitektur.is og Tröð lentu í öðru og þriðja sæti. Þá hlaut arkitektur.is tvær milljónir króna í verðlaun.

Tillaga Arkís þótti svara áherslum dómnefndar í samkeppnislýsingu. „Einkum er gæsluvarðhaldsþættinum gerð frábært skil, sem og aðalvarðstofu og miðlægum rýmum," segir í niðurstöðu dómnefndar.

„Þá eru aðstæður við aðalinngang og tengsl heimsóknaraðstöðu og viðtalsrýmis fyrir utanaðkomandi ráðgjafa vel leyst. Heildaryfirbragð byggingarinnar er mjög áhugavert og tillagan gefur fyrirheit um einfalda, notadrjúga og látlausa byggingu sem samræmist stefnu Fangelsismálastofnunar um örugga og vel skipulagða afplánun."

Nýja fangelsið á Hólmsheiði er gæsluvarðhalds- og móttökufangelsi með deild fyrir kvenfanga og aðstöðu fyrir afplánun skemmri fangelsisrefsinga.

Gert er ráð fyrir 56 rýmum fyrir fanga og mun byggingin leysa af hólmi Hegningarhúsið í Reykjavík og fangelsið í Kópavogi.

Vonast er til að framkvæmdir hefjist vorið 2012 og að þeim verði lokið um miðbik 2015.

Dómnefnd skipuðu: Steinunn Valdís Óskarsdóttir, formaður, Páll E. Winkel, fangelsismálastjóri, og Pétur Örn Björnsson, arkitekt. Þá voru Gylfi Guðjónsson og Hildur Gunnarsdóttir tilnefnd af Arkitektafélagi Íslands.