Þjálfar bardagaíþróttir og leitar að íslenskri konu

„Ég er mjög spenntur að koma með tæknina mína og deila ástríðu minni fyrir sportinu með íslenskum víkingum,“ segir Írinn John Kavanagh, einn þekktasti bardagaíþróttaþjálfari heims, sem undirbýr flutning sinn til Íslands í haust þar sem hann kemur til með að kenna hjá bardagaíþróttaklúbbnum Mjölni.

Kavanagh hefur stundað bardagaíþróttir alla ævi og verið atvinnumaður og þjálfari síðustu tíu ár. Hann hefur unnið fjölda verðlauna sjálfur auk þess sem hann hefur þjálfað heimsmethafa í karla og kvennaflokki frá grunni og verið einn af helstu þjálfurum tveggja bestu keppnismanna landsins, Gunnars Nelson og Árna Ísakssonar.

„Gunnar kom til Írlands í upphafi árs, en hann er einn af bestu vinum mínum og ég er búinn að þjálfa hann í sex ár. Upp kom sú klikkaða hugmynd að ég myndi flytja til Íslands og ég hugsaði bara með mér, af hverju ekki?“ segir Kavanagh sem fékk í kjölfarið tilboð frá Mjölni og ákvað að slá til. „Ég mun fylgja Gunnari vel eftir, en ástríðan mín hefur alltaf verið að kenna byrjendum svo ég kem til með að gera það líka. Ég ætla að reyna að vera til staðar fyrir sem flesta og kem nokkurn vegin til með að búa í Mjölni, enda er ég ekki að flytja til Íslands út af fallega veðrinu,“ bætir hann við hlæjandi.

Kavanagh hefur komið til Íslands nokkrum sinnum og þekkir því ágætlega til á Íslandi. Hann skellti sér á Þjóðhátíð í Vestmannaeyjum síðastliðið sumar og lýsir upplifuninni sem þriggja daga helvíti á jörðu. „Ég handleggsbrotnaði, fékk flensu, tjaldið mitt fauk í burtu og það var stanslaus rigning alla helgina. Einhvern veginn lifði ég þessa för þó af,“ segir hann hress í bragði.

Þrátt fyrir þessa slæmu lífsreynslu segist hann vera mikill aðdáandi íslenskra hefða og lifnaðarhátta og telur sig eiga eftir að falla vel inn í meðal Íslendinga. Hann segist þó vera sérstaklega hrifinn af íslenska kvenfólkinu. „Meginástæðan fyrir því að ég er að koma til Íslands er til að finna mér íslenska konu, hitt er bara yfirhylming. Þú veist að íslensku víkingarnir stálu öllu fallega kvenfólkinu frá Írlandi. Nú er kominn tími til að ná fram hefndum,“ segir John ákveðinn. Það lítur því út fyrir að það sé jafnframt von á góðri viðbót á íslenskan stefnumótamarkað í september.tinnaros@frettabladid.is