Stærsta hjólreiðakeppni ársins á morgun

Stærsta hjólreiðakeppni ársins, hin svonefnda Bláalóns-þraut, fer fram á morgun. Aðstandendur keppninnar segja hana vera stærsta hjólamót sem haldið hefur verið á Íslandi.

Þegar eru um 430 manns skráðir til leiks og hyggjast hjóla Djúpavogsleiðina frá Hafnarfirði og að Bláa Lóninu, eina 60 km.

„Heiðurinn er að veði," segir Ragnar Þór, sölustjóri í Erninum, sem stendur að keppninni. Hann segist ekki vita hvað er í verðlaun en það þykir mikil upphefð í því að vera fyrstur í mark.

Þeir sem fara hraðast fara leiðina á tæpum tveimur klukkutímum. Aðrir geta verið allt að fimm tíma á leiðarenda. Þegar þangað er komið fá allir sér sundsprett í Bláa Lóninu.

Keppendur á morgun verða misvel græjaðir, en mestu keppnismennirnir verða á hjólum sem kosta yfir eina milljón króna. Ragnar rekur slíkar upphæðir til þróunar í hjólreiðaíþróttinni.

Mikill uppgangur hefur verið í íþróttinni að undanförnu og fólk er farið að taka henni af meiri alvöru. Því fylgja svo dýrari og fínni hjól. „Fagmenn í sportinu fjárfesta í hjólum sem eru smíðuð úr carbon-fiber og geta kostað allt upp í 1,2 milljónir," segir Ragnar.

Hjólreiðafélag Reykjavíkur, reiðhjólaverslunin Örninn og Bláa Lónið skipuleggja keppnina.