Eigendastefna um OR samþykkt

Borgarstjórn Reykjavíkur samþykkti eigendastefnu fyrir Orkuveitu Reykjavíkur á fundi sínum í gær. Reykjavíkurborg á 94% hlut í fyrirtækinu en auk höfuðborgarinnar á Akranesbær fimm prósenta hlut og Borgarbyggð eitt prósent.

Dagur B. Eggertsson, formaður borgarráðs, segir að samþykkt borgarstjórnar á eigendastefnunni sé eigendum og fyrirtækinu sjálfu til hagsbóta. Stefna fyrirtækisins sé skýrari fyrir vikið sem og hlutverk allra sem að málum fyrirtækisins koma þegar taka þurfi veigamiklar ákvarðanir.

Í eigendastefnunni er meðal annars fjallað um hlutverk, fjárhagsleg markmið, umboð og valdmörk, samskipti og skýrslugjöf og auðlindanýtingu og afgjald.

Þá er kjarnastarfsemi fyrirtækisins skilgreind sem rekstur vatns-, hita-, raf- og fráveitu, sölu og framleiðslu á rafmagni og heitu og köldu vatni. Loks er fyrirtækinu sett það markmið að skila eigendum sínum arði og veita viðskiptavinum þjónustu á sanngjörnu og samkeppnishæfu verði.

Unnið hefur verið að gerð eigendastefnunnar um nokkurt skeið og voru drög að henni kynnt á síðasta ári. Síðan bárust ýmsar umsagnir frá samtökum og einstaklingum og er eigendastefnan nú fullkláruð.

- mþl