Var handtekinn vegna morðs - fær 200 þúsund í bætur

Héraðsdómur Reykjavíkur dæmdi karlmanni 200 þúsund krónur í miskabætur í síðustu viku en hann var handtekinn í tengslum við morðið á Hannes Þór Helgasyni, sem Gunnar Rúnar Sigurþórsson var dæmdur fyrir. Hann var í haldi lögreglu í um sólarhring.

Maðurinn var handtekinn þremur dögum eftir morðið í ágúst 2010 en maðurinn var fyrrverandi kærasti unnustu Hannesar og hafði lögreglan þær upplýsingar undir höndum að þau hefðu haft samneyti eftir að konan og Hannes tóku saman.

Fram kemur í dóminum að lögreglu hafi strax grunað að um ástríðuglæp væri að ræða. Þegar lögreglan fékk fyrrgreindar upplýsingar í hendur var maðurinn handtekinn, húsleit gerð á heimili hans auk þess sem maðurinn gekkst undir læknisskoðun. Föt fundust á heimili mannsins og var talið að blettur í þeim væri blóð. Daginn eftir kom þó í ljós að ekki var um blóðblett að ræða.

Í niðurstöðu dómsins kemur fram að aðgerðir lögreglu voru eðlilegar og réttmætar. Þá var ekki fallist á það að aðgerðin hafi ekki verið í samræmi við reglur eða hún verið á einhvern hátt óeðlileg.

Aftur á móti segir í niðurstöðu dómsins að maðurinn eigi samkvæmt lögum rétt á miskabótum af hálfu Gunnar Rúnars sem síðar var dæmdur fyrir morðið. Telur héraðsdómur því rétt að bæta honum þann miska, sem telja má að hann hafi hlotið vegna handtöku hans og vistunar í fangaklefa, enda verður ekki litið svo á, samkvæmt gögnum málsins, að hann hafi valdið eða stuðlað að þessum aðgerðum lögreglu.

Þannig voru honum dæmdar 200 þúsund krónur í miskabætur.