Nárameiðsli angra Powell | Verður klár í London

Jamaíski spretthlauparinn Asafa Powell er hættur við keppni á Demantamótinu sem fram fer í London um helgina. Kappinn einbeitir sér að því að ná sér heilum fyrir Ólympíuleikana sem hefjast á sama stað 27. júlí.

„Ég verð að halda mér heilum fyrir leikana og má ekki við því að taka neina áhættu. Ég verð orðinn klár í ágúst," hefur Reuters fréttastofan eftir Powell.

Powell hefur glímt við nárameiðsli síðan á úrtökumótinu í Jamaíka fyrir tveimur vikum. Þá þurfti Powell aðstoð til þess að komast útaf vellinum eftir að hann skilaði sér í þriðja sæti á eftir heimsmeistaranum Yohan Blake og heimsmethafanum Usain Bolt.

Svipuð nárameiðsli komu í veg fyrir þátttöku hans á heimsmeistaramótinu í Suður-Kóreu á síðasta ári.

Keppni í 100 metra hlaupi hefst laugardaginn 4. ágúst. Úrslitahlaupið fer fram daginn eftir.