Björgunarsveitir enn að störfum

Björgunarsveitarmenn eru enn að störfum vegna aftakaverðursins sem gengið hefur yfir landið. Á sjötta hundrað hjálparbeiðnir hafa borist björgunarsveitum. Útlit er fyrir hvassviðri og storm á landinu öllu í dag.

Um þrjátíu björgunarsveitarmenn hafa verið að störfum í morgun. Ólöf Snæhólm Baldursdóttir er upplýsingafulltrúi Landsbjargar. Hún segir björgunarsveitarmenn enn að störfum. Þeir hafa í morgun verið að vinna á Akranesi og á Akureyri en töluvert hafi róast síðan í gær.

Útköllum björgunarsveita tók að fækka í gærkvöldi en björgunarsveitir á höfuðborgarsvæðinu sinntu tíu útköllum í nótt. Þá var björgunarsveitin Gerpir á Norðfirði kölluð út rétt fyrir miðnætti vegna bíls sem fór út af í Oddskarði og Björgunarfélag Akraness á þriðja tímanum í nótt vegna gestahúss sem var að fjúka. Nokkur hætta skapaðist þegar þakplötur tóku að losna af stórri skemmu á Esjumelum í gærkvöldi. Óttast var að þær myndu dreifast yfir Vesturlandsveginn og Leirvogstunguhverfið í Mosfellsbæ og voru íbúar þar því beðnir um að vera ekki á ferli. Um fimm hundruð og fimmtíu aðstoðarbeiðnir hafa borist björgunarsveitunum vegna óveðursins. Ólöf segir það með því mesta sem sést hafi.

Þá voru hátt í tvö hundruð og fimmtíu björgunarsveitarmenn að störfum þegar mest var í gær. Flest voru verkefnin á stór Reykjavíkursvæðinu og en ástandið var einnig erfitt undir Eyjafjöllum. Ólöf segir óvenju margar tilkynningar hafa borist um slys á fólki í fárviðrinu í gær en ríflega fjörtíu manns leituðu á slysadeild Landspítalans eftir að hafa fokið um koll. Hún segir hættulegt ástand hafa myndast við nokkrar stórar byggingar í Reykjavík líkt og Höfðatorgið.

Ég velti því nú fyrir mér hvort að við Íslendingar þurfum ekki að fara að horfa aðeins meira í veðrið þegar að við byggjum," segir Ólöf Snæhólm, upplýsingafulltrúi Landsbjargar. „Ég meina við byggjum traust og góð hús en við ættum að skoða vindinn aðeins meira. Við sáum það í gær að það eru ákveðnir staðir í borginni sem að geta bara hreinlega verið hættulegir út af þessum sviptivindum sem að myndast af byggingum í svona veðri. Kannski væri fyrsta skrefið að kortleggja þá þannig að við vitum hvar við eigum að vara okkur"

Allt innanlandsflug liggur niðri en skoðað verður eftir klukkan eitt hvenær hægt verður að fljúga. Veðrið hefur þó ekki áhrif Herjólf sem siglir í dag á milli Vestmannaeyja og Landeyjarhafnar.

Veðrið hefur nokkuð skánað frá því í gær en samkvæmt upplýsingum frá Veðurstofunni verður áfram hvassviðri og stormur á landinu öllu í dag. Veðrið fer svo að ganga smá saman niður í kvöld og í nótt.