Tvöfalda má framleiðslu úr lífmassa

Eitt aðalumfjöllunarefni norræna samstarfsverkefnisins „CO2 Electrofuels“ er hvernig nýta má raforku á sem hagkvæmastan hátt til að tvöfalda magn eldsneytis sem framleiða má úr lífmassa. Þá snýr verkefnið að því að draga úr raforkunotkun þegar eldsneyti er framleitt úr kolsýru.

Fram kemur í tilkynningu Nýsköpunarmiðstöðvar Íslands að vegna aukinna gróðurhúsaáhrifa sé ljóst að taka þurfi í notkun aðrar tegundir eldsneytis en það sem framleitt sé úr olíu.

Bent er á að notkun landbúnaðarafurða til eldsneytisframleiðslu hafi mætt vaxandi andstöðu vegna þess hve mikið ræktunarland er þá tekið undir annað en matvælaframleiðslu. „Einnig er horft til ýmissa úrgangsefna úr landbúnaði, en nú þegar er mikið af metani framleitt í Evrópu úr mykju og öðrum úrgangi.“

Þá kemur fram að þótt rafbílar kunni að vera vænlegur kostur í stað bensín- og olíudrifinna fólksbíla þá verði rafmagn tæpast notað til þungaflutninga, á flugvélar, millilandaskip eða fiskiskip. „Fyrir þessa notkun þarf orkuríkt eldsneyti, helst svipað því sem nú er notað.“

„CO2 Electrofuels“ samstarfsverkefnið verður kynnt í málstofu milli klukkan eitt og fimm í Náttúrufræðihúsi Háskóla Íslands, Öskju, þriðjudaginn 12. júní næstkomandi.- óká