Meintir fíkniefnasmyglarar fyrir dóm í morgun

Þrír pólverjar, sem ákærðir eru fyrir að flytja 8,6 kíló af amfetamíni, til landsins um miðjan apríl tóku sér allir frest til að lýsa yfir afstöðu til sakarefnisins þegar ákæra gegn þeim var þingfest í morgun.

Eins og fram kemur í Fréttablaðinu í morgun eru tveir mannanna 29 ára og einn 22 ára. Þeir komu til Íslands með flugi frá Varsjá 15. apríl. Tveir þeirra komust í gegnum tollinn í Leifsstöð en voru stöðvaðir í leigubíl á Kringlumýrarbraut. Þegar hundur tollgæslunnar fann fíkniefni í farangri þess þriðja áttuðu tollverðir sig þegar í stað á því að hann hefði ekki verið einn á ferð og gerðu lögreglu viðvart um þá. Þeir voru handteknir á leið inn í borgina.

Í farangri hvers og eins fundust alls fimmtán pakkningar með amfetamíni. Fjórði maðurinn, Pólverji búsettur hér á landi, var handtekinn í kjölfarið og úrskurðaður í gæsluvarðhald ásamt hinum þremur. Hann er ekki ákærður í málinu.