Mögulegt að stela skyrinu af Íslendingum

Einar Karl Haraldsson, ráðgjafi og fyrrum upplýsingafulltrúi forsætisráðuneytisins, segir að skyrinu, sem framleiðsluvöru, geti hæglega verið stolið af Íslendingum með eftirlíkingum frá öðrum löndum. Hægt er að fara ákveðnar leiðir til að koma í veg fyrir þetta og þeirra raunhæfust er sú að setja löggjöf um vernd vöruheitisins.

Einar telur mjög brýnt að setja löggjöf um vernd séríslenskra vöruheita og það verði sífellt brýnna eftir því sem útflutningur vex.

Í morgun var haldin ráðstefna að frumkvæði samtaka mjólkur- og kjötvinnslustöðva um hvernig mögulegt er að verja séríslensk vöruheiti. Erlent dæmi um vernd af þessum toga er feta-ostur frá Grikklandi og kampavín frá champagne héraðinu í Frakklandi.

Einar segir að erfitt sé að verjast eftirlíkingum á alþjóðlegum markaði. Í raun séu bara tvær leiðir. annars vegar að vera með sterkt vörumerki, Coca Cola mætti nefna sem dæmi. Þetta er leið hinna sterku fyrirtækja. Hins vegar að setja löggjöf um vernd vöruheitisins. Þessi leið hentar vel ef varan er af sérstöku svæði eða sameiginleg eign bænda. Nýlegt dæmi um slíka löggjöf má finna í Noregi.

„Þegar maður er kominn með svona vernd innanlands getur maður farið að semja við önnur lönd um gagnkvæmnisvernd," segir Einar og vísar til þess að í Evrópusambandinu finnist listar yfir vörur sem njóta verndar af þessum toga. Hann telur að málið sé að komast á dagskrá hjá íslenskum stjórnvöldum.

Einar var gestur útvarpsþáttarins Reykjavík Síðdegis fyrr í dag en viðtalið við hann má nálgast á hlekknum hér að ofan.