Óttast mengun á framkvæmdatíma

Gísli Marteinn Baldursson, borgarfulltrúi Sjálfstæðisflokksins, segir áhyggjur íbúa vegna aukinnar umferðar við nýjan Landspítala réttmætar. Furðulítil grein hafi verið gerð fyrir umferðaraukningunni og ráðstafanir til að reyna að takmarka þær séu ekki nógu sannfærandi.

„Þetta rosalega byggingarmagn dregur náttúrulega til sín mun meiri umferð en ef við myndum byggja hóflega við spítalann eins og ég hef lagt til.“ Gísli bendir á að bílastæðahúsin, sem tillagan gerir ráð fyrir, séu ein og sér á stærð við tæplega tvo Borgarspítala. Hann telur hins vegar að byggja eigi við spítalann á Hringbraut, en hugmyndin geri ráð fyrir allt of miklu byggingarmagni.

Hjálmar Sveinsson, varaformaður skipulagsráðs, segir að aukinni umferð við spítalann verði mætt með því að draga úr umferð við Háskóla Íslands (HÍ) og hjá starfsmönnum Landspítalans. Gert sé ráð fyrir að gjaldskylda verði í öll bílastæði við þessar stofnanir, sem og bílastæði á milli gömlu og nýju Hringbrautar.

Hjálmar bendir á að um sextíu prósent nemenda við HÍ komi á einkabílum og ef takist að minnka það í fimmtíu prósent, sem væri engu að síður mjög mikið, mundi draga verulega úr umferð um Miklubraut. En hvað með aðra háskóla, svo sem Háskólann í Reykjavík (HR)?

„Við viljum líka vinna að því að þar verði gjaldskylda. Við teljum það ófært og tímaskekkju að hafa þetta gríðarlega flæmi ókeypis bílastæði við HR.“

Gísli segir einnig að engar aðgerðir hafi verið kynntar til mótvægis við þá miklu umferð sem verði á framkvæmdatímanum, en hann geti staðið í mörg ár.

„Þetta eru náttúrulega svakalegar framkvæmdir og ég veit ekki hversu mörgum tonnum af rúmmetrum verður mokað upp og ekið burt, eða hvaða leið á að fara með þá. Það þarf að koma í veg fyrir að ryk fjúki við flutninga og úr grunninum yfir íbúa Hlíðahverfis, nóg er nú samt um svifrykið þar.“kolbeinn@frettabladid.is