Innlent

"Eitthvað mikið að ráðgjöf Hafró"

BBI skrifar
Mynd/Stefán Karlsson
Hafrannsóknarstofnun mældi í vor ástand ýsustofnsins og komst að því að það væri svo alvarlegt að hugsanlega þyrfti að stöðva ýsuveiðar með öllu. Línuveiðimenn á smábátum hafa aftur á móti orðið varir við mikla ýsugengd á grunnslóð víða við landið.

Þetta kemur fram á vef Landssambands smábátaeigenda og þar segir að þetta komi ekki á óvart, „því það vill fylgjast að, að Hafró tilkynni um hræðilegt ástand einstakra stofna og í kjölfarið er ekki friður fyrir viðkomandi kvikindum á miðunum."

Vísað er til bókunnar af fundi bæjarstjórnar Ísafjarðarbæjar, þar sem fram kemur að sjómenn hafi komist í vandræði vegna mikillar ýsugengdar á miðunum. „Þó reynt sé að sneiða fram hjá ýsunni er hún bókstaflega út um allt. Ljóst má vera að eitthvað mikið er að í ráðgjöf Hafrannsóknarstofnunar varðandi ástand ýsustofnsins," segir í bókuninni.

Sjómenn vilja að ráðherra sjávarútvegsmála láti fara yfir ráðgjöf Hafrannsóknarstofnunar og að samráð verði haft við sjómenn.




Fleiri fréttir

Sjá meira


×