Tökur á Oblivion enn í gangi

Það ræðst líklega á morgun hvenær tökum á myndinni Oblivion, sem skartar Tom Cruise í aðalhlutverki, mun ljúka. Þetta staðfestir talsmaður tökuliðsins við Vísi. Tökur hafa farið fram undanfarna daga samkvæmt áætlun, þrátt fyrir þrálátar sögusagnir í erlendum miðlum um að Tom Cruise hafi yfirgefið landið eftir að Katie Holmes sótti um skilnað frá honum. Tökur fara fram núna á Suðurlandi, í nágrenni við Veiðivötn.

Reuters fréttastofan fjallar um skilnaðinn og vinnu Cruise hér á Íslandi í dag. Þar segir að Cruise hafi verið við tökur á myndinni á laugardaginn. Það er í samræmi við frétt Vísis á laugardagskvöld.

Tom Cruise á afmæli á morgun. Upphaflegar fréttir hermdu að hann hefði ætlað að fagna afmælinu með pompi og pragt. Heimildir herma aftur á móti að þær áætlanir hafi verið lagðar til hliðar eftir að Katie sótti um skilnað. Auk Toms hefur Connor Cruise, sonur hans, verið hér á landi að undanförnu. Hann birti nokkrar færslur á Twitter um dvöl sína hér. Eftir að fréttir af skilnaðinum fóru að berast hefur hann hins vegar haldið sig til hlés þar.