Þriðjungur of feitur í Fellaskóla

Mikill munur er á fjölda barna í ofþyngd eftir hverfum á höfuðborgarsvæðinu, samkvæmt könnun sem gerð var fyrir nokkrum árum á sextán þúsund börnum á grunnskólaaldri. Þetta kom fram í þætti Ingu Lindar Karlsdóttur, Stóru þjóðinni, á Stöð 2 í gærkvöldi.

Þannig voru 33 prósent barna í Fellaskóla yfir kjörþyngd og 30 prósent í Hjallaskóla og Kársnesskóla í Kópavogi, en þrettán prósent í Fossvogs-, Húsa- og Valhúsaskóla. 26 prósent barna í Hólabrekku- og Ártúnsskóla voru í yfirþyngd.

Inga Lind segir tölurnar frá árinu 2006, en henni þyki ámælisvert að þær hafi ekki verið notaðar og birtar opinberlega, en þær hafi aðeins verið sýndar á einni ráðstefnu. „Mér finnst það vera með ólíkindum, að þetta sé svona mikið leyndarmál, vegna þess að á meðan þetta er ofan í skúffu hjá einhverjum þá er ekkert verið að gera í málinu.

Unglingarnir okkar eru sérstakt áhyggjuefni.“

Í tengslum við könnunina var félagsleg staða foreldra einnig skoðuð, að því er fram kom í þættinum í gær. „Í hverfunum þar sem tala of þungra og of feitra barna er hæst, er fjöldi háskólamenntaðra foreldra um 11 til 22 prósent. Í hverfunum þar sem minnstur hluti barnanna glímir við ofþyngd og offitu eru um 30 til 34 prósent foreldranna háskólamenntaðir.“ - þeb