Þurfti að slá fundi af vegna mætingar

Hætta þurfti við fundi í umhverfis- og samgöngunefnd og atvinnuveganefnd Alþingis í gær þar sem þingmenn stjórnarandstöðunnar sögðust komnir í sumafrí. Aðeins tveir nefndarfundir hafa verið haldnir síðan þingi var frestað 19. júní.

Björn Valur Gíslason, þingmaður Vinstri grænna, segir að funda hafi átt með gestum um rammaáætlun um vernd og nýtingu náttúrusvæða. Stjórnarandstaðan hafi hins vegar sagst hafa verið komin í frí og neitað að mæta og sinna sínum störfum. Vinnan frestist því fram á haustið. „Það er úr vöndu að ráða ef menn bara stræka. Þú sendir ekki skipið á sjó ef það mætir bara önnur vaktin.“

Björn Valur bendir á að samkvæmt þingsköpum séu lögbundin sumarfrí Alþingis frá 1. júlí til 10. ágúst og enn lifi af júní. „Þeir eru bara farnir að slæpast og vilja ekki vera með. Þeir hafa kannski sprengt sig á lokasprettinum og eru núna heima að púsla. Það þarf að gefa þeim hafragraut og lýsi á morgnana og athuga hvort Eyjólfur hressist ekki.“

Jón Gunnarsson, þingmaður Sjálfstæðisflokksins, segir málið dæmigert fyrir flaustursgang ríkisstjórnarinnar. Ekkert hafi verið fundað í atvinnuveganefnd um áætlunina síðustu þrjár vikur þingsins. Ástæðan sé ágreiningur milli stjórnarflokkanna. Samið hafi verið um afdrif málsins samhliða þinglokum. Það hafi því komið á óvart að þessi vika hafi verið ætluð í nefndarfundi.

„Á þeim tíma voru menn náttúrulega búnir að gera ráðstafanir með sumarleyfi og annað, sumir komnir til útlanda og slíkt, þannig að við töldum þetta bara ekki boðlegt.“

Jón segir tilgangslaust að funda um málið, það verði að leggja fram að nýju í haust og vinna með gestum nú hefði því farið forgörðum.

Ólína Þorvarðardóttir, þingmaður Samfylkingarinnar, hefur skilning á því að illa hafi gengið að manna fundi. „Þingmenn eru komnir í langþráð sumarfrí eftir harða vinnutörn undanfarinna þriggja ára. Þeir eru horfnir til sinna fjölskyldna og annarra starfa í kjördæmunum.“

Í samningum um þinglok felst að þegar rammaáætlun kemur aftur fyrir þing í haust er litið svo á að fyrstu umræðu sé lokið, þar sem um málið var rætt á nýyfirstöðnu þingi.

kolbeinn@frettabladid.is