Fundu lítinn yrðling og tóku hann í fóstur

"Mamma var að keyra Ströndina og sá eitthvað hreyfast á veginum. Hún ákvað að kíkja á þetta og sá að þetta var yrðlingur.

Hún ákvað svo að keyra í burtu og koma eftir korter, því ef hann ætti mömmu myndi hún sækja hann. Svo komum við aftur og þá var hann enn þá þarna,“ segir Thelma Dögg Freysdóttir. Hún hefur ásamt fjölskyldu sinni tekið yrðlinginn í fóstur.

"Við gátum ekki skilið hann eftir. Við vorkenndum honum, greyinu. Þannig að við tókum hann að okkur og hann er hérna enn,“ segir Thelma en fjölskyldan hefur gefið yrðlingnum nafnið Úlfur.

Thelma segir að þau hafi frétt af veiðimanni sem hafi skotið tófu degi áður en þau fundu yrðlinginn. Það hafi líklegast verið móðirin.

Annar yrðlingur fannst svo þremur dögum seinna. Hann var mjög vannærður og er nú í fóstri á öðru heimili.

Thelma segir að yrðlingurinn þeirra hafi ekki verið í góðum holdum þegar hann fannst og hafi verið svangur.

"Við fórum strax með hann heim og gáfum honum hakk. Núna gefum við honum blautan kattamat og hakk. Svo drekkur hann kaffirjóma með eggjum út í.“

Yrðlingnum hefur verið úthlutað hundabúri, en fyrir á fjölskyldan nokkra hunda. Thelma segir sambúðina við hundana ganga vel.

"Þeir leika sér bara saman í rauninni. Hann er enn svo lítill.“

Rósa Kristín Jensdóttir, móðir Thelmu, segist ekki vita hvort fjölskyldan geti séð um yrðlinginn til frambúðar.

"Ég veit ekki hvort það er sniðugt að hafa hann með hundunum. Ég á eftir að fara með hann inn í Húsdýragarð og sýna þeim hann. Ég held að hann muni eiga lengsta og besta lífið þar.“

Rósa hefur þó kynnt sér yrðlingauppeldi. "Ég hef lesið mér til á netinu og fólk hefur alið yrðlinga upp. Það er gert með svipuðum hætti og gert er við hunda. Það hefur bara gengið ágætlega. En þetta eru náttúrulega rándýr og grimm að eðlisfari, þannig að maður gæti alveg orðið fyrir biti,“ segir Rósa.

Thelma er þó hæstánægð með nýju viðbótina á heimilinu.

"Hann er algjört krútt og bræðir mann alveg.“katrin@frettabladid.is