Vinna við Vaðlaheiðargöng gæti hafist síðsumars

Fyrsti fundur um gerð verksamnings vegna Vaðlaheiðarganga verður á morgun milli Vegagerðarinnar og lægstbjóðanda. Verktakinn segist geta hafist handa eftir tvo mánuði.

Tveimur vikum eftir að Alþingi samþykkti með 29 atkvæðum gegn 13 að ríkissjóður lánaði allt að 8,7 milljarða króna til Vaðlaheiðarganga er komið að því að stíga næsta skref. Á morgun hefjast viðræður milli Vegagerðarinnar og verktakans, sem átti lægsta boð, ÍAV og Marti, um verksamninginn, en þeir buðust í október í haust til að grafa göngin fyrir 8,9 milljarða króna.

Gísli Eiríksson, sem kemur að verkefninu fyrir hönd Vegagerðarinnar, segir að venjulega taki nokkrar vikur að ljúka gerð verksamnings og giskar á undirritun seinnipartinn í ágúst. Út frá því áætlar Gísli að vinna við göngin geti hafist í haust en tekur fram að fyrst þurfi aðrir verktakar að ljúka smíði bráðabirgðabrúar og vegar að vinnusvæði.

Karl Þráinsson, forstjóri ÍAV, segir að þeir gætu hafist handa í kringum mánaðamótin ágúst-september. Byrjað verði á að grafa frá væntanlegum gangamunnum og telur Karl að fyrsta sprenging geti orðið í lok nóvember eða byrjun desember.