Milljarðahagnaður bankanna á verðbólgunni

Íslensku bankarnir hafa síðustu tólf mánuði hagnast um 8,9 milljarða af verðtryggingunni, án þess að gera neitt. Ólafur Margeirsson, doktorsnemi í hagfræði við háskólann í Exeter í Bretlandi, bendir á þetta á facebooksíðu sinni. Hann vísar í nýja skýrslu Seðlabankans um fjármálastöðugleika þar sem fram kemur að verðtryggingarmisvægi viðskiptabankanna er jákvætt um 208 milljarða króna.

Það þýðir að ef neysluverðsvísitalan hækkar um 1%, þ.e. 1% verðbólga, fá viðskiptabankarnir rúmlega 2 milljarða króna hagnað, vegna þess eins að verðtryggðar eignir þeirra eru meiri en verðtryggðar skuldir þeirra.

„Ársverðbólga er nú 4,3%. Það þýðir að bankarnir hafa fengið 8,9 milljarða króna. síðustu 12 mánuði í "verðtryggingarhagnað". Án þess í raun að gera neitt," segir Ólafur. Hann segir að ekki megi gleyma því að viðskiptabankarnir geti aukið verðbólgu með því einu að lána út meira fé. Þeir geti því haft fullkomna stjórn á hagnaði sínum.

Í samtali við Vísi segir Ólafur Margeirsson að þetta sé alls ekki nýtt vandamál og að bankarnir hafi oft sýnt betra uppgjör af þessari ástæðu. „Þetta er frjáls hagnaður og þeir geta aukið hann með því einu að lána út aukið fé," segir Ólafur. „Þeir græða því tvöfalt á því að lána út meira fé. Vegna þess að þeir fá vaxtahagnað af því að lána út meiri peninga og fá líka verðtryggingahagnað á að lána út meiri peninga líka," segir Ólafur að lokum.