"Lögfræðingurinn í manni vill sjá málið hjá Hæstarétti"

Kristín Ástgeirsdóttir, framkvæmdastýra Jafnréttisstofu, hafði ekki kynnt sér dóms Héraðsdóms Reykjavíkur í máli Önnu Kristínar Ólafsdóttur gegn forsætisráðuneytinu þegar Vísir hafði samband við hana í morgun. Kristín er á ferðalagi erlendis en fréttastofa náði í staðinn tali af Ingibjörgu Elíasdóttur, lögfræðingi hjá Jafnréttisstofu.

Það sem er merkilegt við niðurstöðu héraðsdóms er niðurstaðan um að úrskurðir jafnréttisnefndar verði bindandi ef stjórnvöld höfða ekki mál innan ákveðinna málshöfðunarfresta til að reyna að hnekkja þeim. Þetta segir Ingibjörg aðspurð út í málið.

Héraðsdómur komst í gær að þeirri niðurstöðu að Jóhanna Sigurðardóttir, forsætisráðherra hefði brotið gegn jafnréttislögum með því að ráða karl sem skrifstofustjóra í forsætisráðuneytið fram yfir jafnhæfa konu. Í niðurstöðu héraðsdóms var bindandi úrskurður kærunefndar jafnréttismála lagður til grundvallar.

Árið 2008 var sett inn í jafnréttislög nýmæli um að úrskurðir kærunefndar jafnréttismála væru bindandi. Hingað til hefur ekki verið skýrt hvað nákvæmlega það þýði. Með héraðsdómnum í gær var tekið á þessum vafa. „Nú vill bara lögfræðingurinn í manni að málið fari til Hæstaréttar svo við fáum endanlega niðurstöðu," segir Ingibjörg.