Olíumálaráðherra Noregs kemur til Íslands í næstu viku, ásamt tíu manna sendinefnd, til að vera við athöfn þegar fyrstu olíuvinnsluleyfin í íslenskri lögsögu verða gefin út.
Noregur er fimmta mesta olíuútflutningsríki jarðar, þar er olíuiðnaðurinn mikilvægasta atvinnugreinin, og embætti olíumálaráðherrans eitt það áhrifamesta í landinu. Því vekur það athygli að útgáfa fyrstu olíuvinnsluleyfanna á Drekasvæðinu skuli vera tilefni þess að norski olíumálaráðherrann, Ola Borten Moe, ákveður að heimsækja Ísland en hér sést hann með Oddnýju Harðardóttur, þáverandi iðnaðarráðherra, á fundi fyrr á árinu um olíuvinnslu á Norðurslóðum.
Gestgjafi hans verður Steingrímur J. Sigfússon atvinnuvegaráðherra en áformað er að þeir verði báðir við athöfn í Ráðherrabústaðnum í lok næstu viku þegar tvö fyrstu sérleyfin verða formlega gefin út. Með olíumálaráðherranum kemur tíu manna sendinefnd, en í henni verða meðal annarra fulltrúar norska ríkisolíufélagsins Petoro, sem tekur þátt í olíuleitinni fyrir hönd norska ríkisins.
Með Íslandsheimsókn sinni innsiglar norski olíumálaráðherrann þátttöku Norðmanna í olíuleit með Íslendingum, sem staðfest var með samþykkt Stórþingsins fyrir jól, en jafnframt má ætla að ráðherrann vilji um leið undirstrika þá áherslu sem norska ríkisstjórnin ætlar sjálf að leggja á fyrirhugaða olíuleit sín megin á Jan Mayen-svæðinu.
Norski olíumálaráðherrann kemur vegna Drekaleyfanna
Tengdar fréttir
Leyfisveiting á Drekasvæðinu vekur athygli olíuheimsins
Tilkynning íslenskra stjórnvalda um veitingu sérleyfa til olíuvinnslu á Drekasvæðinu hefur vakið athygli fjölmiðla í Bretlandi og helstu vefmiðla í olíugeiranum. Netmiðill breska útvarpsins, BBC, og skoski miðillinn The Scotsman, eru meðal þeirra sem birt hafa frétt um málið, en einnig viðskipta- og olíufréttamiðlar eins og World-Oil, Natural Gas Europe og Offshore Magazine.
Stórþingið samþykkti einróma að leita olíu með Íslendingum
Norska Stórþingið samþykkti einróma þátttöku norska ríkisins í olíuleit og olíuvinnslu í lögsögu Íslands á Drekasvæðinu. Orkumálastjóri segir þetta með stærstu atburðum í olíumálum Íslendinga til þessa. Ríkisstjórn Noregs var áður búin að samþykkja fyrir sitt leyti á ríkisstjórnarfundi að norska ríkið nýtti sér ákvæði Jan Mayen-samkomulagsins um 25% þátttöku í sérleyfum á Drekasvæðinu.
Áætlar fyrsta borpallinn við Jan Mayen árið 2017
Olíustofnun Noregs áætlar í nýrri skýrslu að verðmæti olíu- og gaslinda við Jan Mayen geti verið þrettán þúsund milljarðar króna og að hreinn hagnaður af vinnslunni geti numið allt að níu þúsund milljörðum. Norðmenn gera ráð fyrir að fyrsti borpallurinn verði kominn á svæðið árið 2017. Eyfirðingar fundu smjörþefinn í sumar af þeim umsvifum sem Norðmenn hafa sett í gang á hafsvæðunum norðaustan Íslands þegar floti rannsóknarskipa kom til Akureyrar til áhafnaskipta og til að sækja vistir og þjónustu.
Norðmenn skoða Ísland sem þjónustumiðstöð olíuleitar
Norðmenn gera í nýrri skýrslu um olíuleit á Noregshluta Jan Mayen-hryggjarins ráð fyrir þeim möguleika að þjónustunni verði sinnt frá Íslandi. Þrefalt lengra er að þjónusta borpalla frá Noregi. Það eru ekki bara Íslendingar sem áforma olíuleit á Jan Mayen-svæðinu. Norðmenn eru einng komnir á fullt við að undirbúa leit sín megin og miðað við þann kraft sem þeir hafa nú sett í málið gæti svo farið að þeir verði fyrri til að hefja boranir á svæðinu, jafnvel árið 2017.
