Stórþingið samþykkti einróma að leita olíu með Íslendingum

Kristján Már Unnarsson skrifar 19. desember 2012 18:35

Norska Stórþingið samþykkti einróma þátttöku norska ríkisins í olíuleit og olíuvinnslu í lögsögu Íslands á Drekasvæðinu. Orkumálastjóri segir þetta með stærstu atburðum í olíumálum Íslendinga til þessa.

Ríkisstjórn Noregs var áður búin að samþykkja fyrir sitt leyti á ríkisstjórnarfundi að norska ríkið nýtti sér ákvæði Jan Mayen-samkomulagsins um 25% þátttöku í sérleyfum á Drekasvæðinu. Málið þurfti hins vegar að bera undir Stórþingið og varð niðurstaðan á kvöldfundi í gærkvöldi sú að málið var samþykkt einróma.

Guðni A. Jóhannesson orkumálastjóri segir þetta ákaflega þýðingarmikið að Norðmenn komi þarna inn og með stærstu einstöku atburðum í þessari sögu, að minnsta síðan hann kom að þessum málum fyrir fimm árum.

Með samþykkt Stórþingsins var ríkisolíufélaginu Petoro falið að annast verkefnið fyrir hönd norska ríkisins en það er eitt mikilvægasta fyrirtæki Noregs. Ásamt Statoil er Petoro stærsti rétthafi á landgrunni Noregs, kemur að 35 vinnslusvæðum og 140 rannsóknarleyfum. Það hefur í tveggja áratuga sögu sinni fjárfest yfir þrjúþúsund milljarða íslenska króna í olíusvæðunum og skilað átján þúsund milljörðum króna til norska ríkisins, sem eru um þriðjungur olíutekna þess.

Samþykkt Stórþingsins felur í sér að Petoro Iceland verður stofnað sem norskt dótturfélag, með útibú á Íslandi, og verður rétthafi vinnsluleyfa í lögsögu Íslands. Guðni segist merkja af símtölum sem honum berist utan úr heimi frá fréttamönnum á þessu sviði að þetta vekur athygli, enda hafi norsk fyrirtæki verið mjög sterk í olíuleit á svipuðum svæðum, þau þekki þessa jarðfræði og þessar aðstæður.

Framundan er að gefa formlega út tvö fyrstu olíuvinnsluleyfin; annars vegar til Faroe Petroleum Norge AS, Íslensks kolvetnis ehf. og Petoro Iceland AS, og hins vegar til Valiant Petroleum ehf., Kolvetnis ehf. og Petoro Iceland AS, og segir orkumálastjóri að reynt verði að ljúka leyfisveitingunni strax eftir áramót.

Tengdar fréttir

Stofnun "Petoro Iceland" lögð fyrir Stórþingið

Tillaga sem heimilar norska ríkinu að taka þátt í olíuleit á íslenska Drekasvæðinu var lögð fram í norska Stórþinginu í dag. Hún er hluti breytingartillögu við fjáraukalög Noregs vegna ársins 2012, sem fjárlaganefnd Stórþingsins flytur. Þar er óskað eftir heimild til handa olíu- og orkumálaráðuneytinu, fyrir hönd norska ríkisins, til að "taka þátt í og undirbúa þátttöku í olíustarfsemi í íslenskri lögsögu".

13. desember 2012 19:26

Leyfisveiting á Drekasvæðinu vekur athygli olíuheimsins

Tilkynning íslenskra stjórnvalda um veitingu sérleyfa til olíuvinnslu á Drekasvæðinu hefur vakið athygli fjölmiðla í Bretlandi og helstu vefmiðla í olíugeiranum. Netmiðill breska útvarpsins, BBC, og skoski miðillinn The Scotsman, eru meðal þeirra sem birt hafa frétt um málið, en einnig viðskipta- og olíufréttamiðlar eins og World-Oil, Natural Gas Europe og Offshore Magazine.

5. desember 2012 17:44

Aðild Norðmanna sýnir að þeir hafa trú á olíu á Drekasvæðinu

Ákvörðun norskra stjórnvalda að taka þátt í olíuleit á íslenska Drekasvæðinu er fagnað af væntanlegum leyfishöfum, sem segja þetta skilaboð til olíufélaga heims um að mikils sé að vænta. Steingrímur J. Sigfússon atvinnuvegaráðherra segir að fengur sé að fá Noreg með í verkefnið. Það er í samræmi við samkomulag um gagnkvæman 25 prósenta rétt á afmörkuðu svæði sem norsk stjórnvöld tilnefndu í morgun Petoro til þátttöku en félagið er að öllu leyti í eigu norska ríkisins og var áður hluti af Statoil.

3. desember 2012 18:36

Mest lesið

Fleiri fréttir